15,495 total views
Itinalaga ng Papa Francisco si Cebu Auxiliary Bishop Midyphil Billones bilang ika – 14 na arsobispo ng Archdiocese of Jaro.
Isinapubliko ng Vatican ang appointment nitong February 2 kasabay ng pagdiriwang ng Kapistahan ng Mahal na Birhen ng Candelaria ang patrona ng Jaro at buong Western Visayas.
Si Archbishop-designate Billones ang hahalili kay Archbishop Jose Romeo Lazo makaraang tanggapin ni Pope Francis ang pagretiro ng arsobispo.
Tubong Panay, Capiz ang bagong arsobispo ng Jaro at nagtapos ng Philosophy sa St. Vincent Ferrer Seminary sa Iloilo City, Theology sa Loyola School of Theology sa Quezon City habang 2011 nang magtapos ng Doctorate in Theology sa Pontifical Gregorian University sa Roma.
Inordinahang pari ng Jaro noong October 2, 1995 kung saan ilan sa ginampanang tungkulin ang pagiging personal secretary kay Archbishop Alberto Piamonte at Archbishop Angel Lagdameo.
Ang appointment ni Archbishop-designate Billones ay ilang linggo lang makaraang mailuklok si dating Cebu Auxiliary Bishop Ruben Labajo bilang kauna-unahang obispo ng Diocese of Prosperidad.
Nagsilbing rector ng St. Joseph Regional Seminary sa Jaro si Bishop Billones nang hiranging obispo ni Pope Francis noong July 2019 habang ginawaran ng episcopal ordination noong August 27, 2019 sa Jaro Metropolitan Cathedral.
Bilang ika – 14 na arsobispo ng Jaro ipapastol ni Archbishop-designate Billones ang mahigit tatlong milyong katoliko sa lalawigan ng Iloilo, Iloilo City at Guimaras katuwang ang humigit kumulang sa 200 mga pari sa 94 na mga parokya.
