10,809 total views
Pinag-iingat ng St.James the Elder Cathedral Parish ng Diocese of Bangued sa Abra ang publiko hinggil sa umiikot na solicitation letter gamit ang pangalan at lagda ni Bishop Leopoldo Jaucian, SVD.
Sa pabatid ng cathedral may mga grupo at indibidwal ang iligal na ginagamit ang pangalan at lagda ng obispo para makapangalap ng pondo.
Binigyang diin ng dambana na walang grupo o indibidwal ang pinahintulutan ni Bishop Jaucian sa pangangalap ng pondo gamit ang kanyang pangalan.
“We would like to clarify and inform the public that the bishop has not authorized any form of solicitation nor has he delegated or mandated anyone to solicit on his behalf at this time,” bahagi ng pahayag ng Bangued Cathedral.
Paalala nito sa mananampalataya lalo na sa mga nasasakupang parokya ng diyosesis na maging maingat sa pakikipag-ugnayan sa mga indibidwal at grupong gumagamit sa pangalan ni Bishop Jaucian upang maiwasan ang mga scam activities at maling paggamit ng ecclesiastical authority.
Hinimok nito ang publiko na agad makipag-ugnayan sa mga tanggapan ng bawat parokya o sa tanggapan ni Bishop Jaucian upang beripikahin ang anumang sulat na matatanggap lalo na kung ito ay may kinalaman sa usaping pinansyal.
Patuloy ang paalala ng Catholic Bishops’ Conference of the Philippines sa mamamayan na maging maingat laban sa mga indibidwal na ginagamit ang pangalan mga lider ng simbahan para sa pansariling interes at iba pang fraudulent activities.
