531 total reads
Ito ayon kay Fr. Jerome Secillano, Executive Secretary ng CBCP-Permanent Committee on Public Affairs, ang simbahan ay itinuturing na tahanan ng Diyos na pinagdarausan ng mga mananampalataya bilang bahay-dalanginan.
“May akmang lugar para sa bawat gawain ng tao. Kung ang mga politiko ay nagtitipon sa mga hotel o convention centers para sa kanilang pagpupulong, ganun din ang mga Katoliko sa kanilang pananalangin, ginagawa nila ito sa simbahan na isang bahay-dalanginan,” ayon kay Fr. Secillano.
Ipinaliwanag ng pari na sa loob ng simbahan nakaluklok ang Eukaristiya – ang katawan ng Diyos sa anyong hostia o tinapay na hindi matatagpuan sa bawat tahanan kaya’t mahalaga ang pagsisimba.
“Sa loob ng Simbahan nakaluklok ang Eukaristiya, ang katawan ng Diyos sa anyo ng hostia o tinapay. Ito ang wala sa mga bahay at hindi rin pinapahintulot ang pagluluklok nito sa bawat tahanan,” dagdag pa ni Fr. Secillano.
Unang kinondena ni Balanga, Bataan Bishop Ruperto Santos ang pahayag ng Pangulong Duterte na nagpapayo sa mga katoliko na iwaksi ang pagsisimba sa halip ay magtayo ng kapilya sa kanilang mga bahay.
Bagama’t hindi kautusan ang palagiang pagsisimba ay pinapaalalahanan ang mga mananampalataya na maglaan ng panahon na makapiling ang Diyos sa kanyang tahanan.
Sa katuruan ng simbahan isang obligasyon ng bawat mananampalataya ang pagsisimba tuwing araw ng linggo.
Dahil nagiging matatag ang pananampalataya sa magkakasama at nagsasalo sa piging na inihanda ng Panginoon bilang pag-alaala sa kanyang pagpapakasakit.
Ilan din sa mga idineklarang ‘Holiday of Obligation’ ang December 8-Feast of Immaculate Conception; December 25- Christmas Day at January 1- Solemnity of Mary, Mother of God.
