8,472 total reads
Hinimok ni Imus Bishop Reynaldo Evangelista ang mga mananampalataya na patuloy na ipanalangin si Pope Leo XIV upang magabayan siya sa kanyang pamumuno sa Simbahang Katolika at sa pagsusulong ng kapayapaan, katarungan, at malasakit sa buong mundo.
Ito ang mensahe ng obispo sa pagdiriwang ng Pope’s Day Mass sa Manila Cathedral kasabay ng Dakilang Kapistahan nina Apostol San Pedro at San Pablo.
Batid ni Bishop Evangelista ang kahalagahan ng mga panalangin para sa mga gawaing pagpapastol ng Santo Papa.
“Napakahalaga rin na sa dakilang kapistahang ito ay ipagdasal natin ang ating kasalukuyang Santo Papa, si Pope Leo XIV, sa kanyang pamumuno sa buong Simbahan at sa buong mundo,” pahayag ni Bishop Evangelista sa Radyo Veritas.
Binigyang-diin ng obispo na napakalaki ng pananagutang ginagampanan ng Santo Papa bilang pastol ng Simbahan, lalo na sa pagsusulong ng kapayapaan at pagtatanggol sa dignidad ng bawat tao.
“Napakahalaga ng kanyang ginagampanang tungkulin, lalo na sa pagtataguyod ng kapayapaan sa buong mundo, ng katarungan, at ng pagmamalasakit, lalo na sa mga nangangailangan at naghihirap,” ani ng obispo.
Tinukoy ni Bishop Evangelista ang agarang pakikiisa ni Pope Leo XIV sa mga biktima ng kamakailang lindol sa Venezuela bilang patunay ng malasakit nito sa mga taong dumaranas ng kalamidad at krisis, at maging sa mga mamamayang nakararanas ng kahirapan dahil sa karahasan.
Hinikayat ng obispo ang mga mananampalataya na higit pang patibayin ang kanilang pananampalataya at patuloy na suportahan ang misyon ng Simbahan sa pamamagitan ng panalangin para sa punong pastol.
“Sana ay patuloy nating ipagdasal ang ating Santo Papa. Ipagdasal din natin ang buong Simbahan, at lalo nating mahalin ang ating pananampalatayang Kristiyano, ang ating pananampalatayang Katoliko, na nagmula at ipinasa sa atin ng mga apostol,” dagdag ni Bishop Evangelista.
Pangunahing tungkulin ng Santo Papa ang pagbuklurin ang sangkatauhan tungo sa landas ni Hesus batay sa habilin nito kay San Pedro, ang kauna-unahang Santo Papang pinagkatiwalaan ng mga gawaing pagpapastol.
Ayon pa sa obispo, ang pagdiriwang ng Dakilang Kapistahan nina San Pedro at San Pablo ay paalala sa mahalagang ambag ng dalawang apostol bilang mga haligi ng Simbahan at sa pananagutang ipagpatuloy ng bawat mananampalataya ang kanilang iniwang pamana ng pananampalataya at paglilingkod.
Kay Pedro inihabilin ni Hesus ang simbahan sa lupa habang si San Pablo naman, na kilala noong mang-uusig ng mga Kristiyano, ay nagbagong-buhay at naging misyonerong nangunguna sa pangangaral tungkol kay Hesus sa iba’t ibang dako.
Si San Pedro ay ipinako sa nakabaliktad na krus sa Roma habang si San Pablo naman ay pinugutan ng ulo sa naturang bansa.
Mula kay San Pedro, nahalal si Pope Leo XIV noong May 8, 2025 bilang ika-267 na Santo Papa ng Simbahang Katolika.
