359 total views
Nag-alay ng natatanging panalangin si Antipolo Bishop Ruperto Santos para sa mga cancer patient sa pagbisita ng mga pari ng Diocese of Antipolo sa dambana ng Sanctuary of Our Lady of Lourdes sa France.
Sa kaniyang panalangin, hiniling ni Bishop Santos sa Diyos ang kagalingan, lakas, at pag-asa para sa mga nakikipaglaban sa cancer, lalo na sa mga dumaranas ng takot, pagod, at pangamba dulot ng kanilang karamdaman.
“Lord Jesus, Divine Healer, embrace those who suffer from pain, exhaustion, and anxiety. Touch their bodies with Your healing hand, calm their troubled hearts, and renew their spirit with hope,” bahagi ng panalangin ng obispo.
Ipinanalangin din ni Bishop Santos ang mga pamilya, caregiver, doktor, nars, at lahat ng nangangalaga sa mga may sakit upang patuloy silang maging kasangkapan ng malasakit at pagmamahal ng Panginoon.
Binigyang-diin pa ng obispo na sa gitna ng paghihirap at pagsubok ay nananatiling buhay ang pag-asa at pananampalataya ng tao sa Diyos.
“We entrust all cancer patients to the maternal care of Our Lady of Peace and Good Voyage, that she may wrap them in comfort and bring them closer to Your Son, Jesus,” ayon pa sa panalangin.
Sa datos ng Philippine Cancer Society, umaabot sa 150,000 ang nagkakaroon ng cancer sa Pilipinas kada taon, kung saan karaniwan ang breast at cervical cancer.
Itinuturing naman ang cancer bilang pangalawa sa nangungunang cause of death ng mga Pilipino, partikular ang lung at liver cancer na naitatala sa 21,000 at 11,700 kada taon.
Ang pagbisita ng mga pari ng Diocese of Antipolo sa Lourdes, France ay bahagi ng kanilang pilgrimage at espirituwal na paglalakbay sa isa sa mga kilalang dambana ng kagalingan at debosyon sa Mahal na Birheng Maria.
Ito ay bahagi rin ng pagdiriwang ng diyosesis sa ikaapat na sentenaryo ng pagdating ng imahe ng Nuestra Señora de la Paz y Buen Viaje o Birhen ng Antipolo sa Pilipinas mula sa Mexico, gayundin ang ika-100 anibersaryo ng canonical coronation ng Mahal na Birhen.
