358 total views
Isinusulong ng Caritas Manila ang higit na pagpapahalaga at pagkilala sa mga kababaihan na ngayon ay nangunguna sa ibat-ibang larangan higit na sa Social Service Development.
Sa paggunita ng International Women’s month tuwing buwan ng Marso at Women’s day sa ika-8 ng kasalukuyang buwan, nagbigay-pugay si Caritas Manila executive director Fr.Anton CT Pascual sa lahat ng kababaihan.
Ipinagdarasal ni Fr.Pascual na tuluyan nang mawala ang diskriminasyon at pang-aabuso sa mga kababaihan na nilikha ng panginoon kapantay ng mga lalaki.
“Una sa lahat, pinagpahalagahan ng Diyos ang kababaihan sa ating buhay, pinagpahalagahan ng Diyos ang kababaihan nang nilikha niya ang tao, lalaki at babae. Kaya sa ating pagiging Kristiyano, naway kasama yan ang ating malalim na respeto sa kababaihan. Naway pantay ang ating pagtingin sa kanila tulad ng kalalakihan, mabigyan ng oportunidad na pantay, at naway sila ay tunay na maging aktibong mga pinuno at lingkod sa ating lipunan,” ayon sa panayam ng Radyo Veritas kay Fr.Pascual.
Kinilala ng pinuno ng Caritas Manila ang pagiging huwaran ng mga kababaihan sa paglilingkod sa panginoon at mga mahihirap bukod pa sa pagtataguyod sa pamilya.
“Ako nga po sa aking trabaho sa simbahan, NGO, at kooperatiba, ako po ay napapaligiran ng mga magagaling at mahusay na kababaihan na talagang huwaran ng pagiging lingkod ng Panginoon at huwaran din sa kanilang tahanan at pamilya. Buhay ang mga kababaihan ng bansang Pilipinas,” ayon sa mensahe ni Fr.Pascual sa Radyo Veritas.
Ngayong 2026, tema ng pagdiriwang sa International Women’s Day 2026 ay “Rights. Justice. Action. For ALL Women and Girls”.
