Nagpahayag ng suporta ang advocacy arm ng Catholic Bishops’ Conference of the Philippines sa mga pamayanang apektado ng pagmimina sa pagdiriwang ng Mining Hell Week 2026.
Ayon kay Caritas Philippines president, San Carlos Bishop Gerardo Alminaza, ang pakikibaka ng mga komunidad sa kanilang lupa ay higit pa sa usaping pangkalikasan.
Sinabi ng obispo na ang kasalukuyang suliranin ay bahagi ng mas malawak na sistema ng extractivism, isang modelo ng kaunlaran na tinitingnan ang mundo bilang imbakan ng yaman para sa kita, na madalas nagiging kapinsalaan ng mga pamayanan at ng susunod na henerasyon.
Binigyang-diin ni Bishop Alminaza na ang malakihang pagmimina ay sumisira sa kagubatan, nagpaparumi sa mga watershed, at pumipinsala sa kabuhayan ng mga magsasaka, mangingisda, at katutubo.
“But beyond the local damage,it also feeds a global economythat remains dangerously dependent on fossil fuelsand unsustainable extraction,” ayon kay Bishop Alminaza.
Muling inalala ng obispo ang pahayag ni Pope Francis sa Laudato Si, na ang sigaw ng daigdig at ang sigaw ng mahihirap ay iisa.
Aniya, kapag inaabuso at sinisira ang likas-yaman, ang pinakamahihirap ang una at labis na nagdurusa.
Nanawagan ang simbahan ng paglipat mula sa mapaminsalang industriya ng pagmimina tungo sa renewable energy, sustainable agriculture, at community-based development na may paggalang sa tao at kalikasan.
Iginiit din ni Bishop Alminaza ang pagkansela ng mining permits na may paglabag at kakulangan sa tunay na konsultasyon.
“At this critical moment, we must choose a different path, one that places life, justice, and care for creation at the center of development… Your struggle is not only for your communities. It is a struggle for the future of our planet. Together, let us defend our common home,” saad ni Bishop Alminaza.
Ngayong taon, isinasagawa ang Mining Hell Week mula March 9 hanggang 14, na may temang “Baha ng Mina, Barikada ang Depensa!”, tampok ang serye ng pagkilos sa pambansa at lokal na antas na magbibigay-diin sa mga panawagan at pakikibaka ng mga komunidad na apektado ng pagmimina.
Kaugnay ito sa paggunita tuwing Marso sa anibersaryo ng Philippine Mining Act of 1995, isang batas na sa loob ng maraming dekada ay inuuna ang kita kaysa sa kapakanan ng tao at kalikasan.
