9,874 total views
Hinikayat ng Department of Environment and Natural Resources (DENR) ang lahat ng Pilipino na makiisa sa taunang paggunita ng Earth Hour.
Ayon kay DENR Secretary Juan Miguel Cuna, maipapakita ang pakikibahagi sa pandaigdigang kampanya sa pamamagitan ng simple ngunit makabuluhang hakbang, tulad ng pagpapatay ng mga ilaw at pagtanggal sa saksakan ng mga appliances na hindi ginagamit, kahit isang oras lamang.
Batid ni Cuna ang nararanasan ng mamamayan dulot ng epekto ng pagbabago ng klima—mula sa matinding init, lumalalang pagbaha, hanggang sa tumataas na singil sa kuryente.
“Ang kalikasan ay bahagi ng ating araw-araw na buhay. Kaya’t malinaw ang direktiba ng Pangulo: dapat kumilos ang pamahalaan sa mga problemang nararamdaman ng tao araw-araw, at kumilos ngayon,” ayon kay Cuna.
Ipinapaalala ng kalihim na bahagi ng mga hakbang ng DENR ang paglilinis ng mga daluyan ng tubig, pagpapalakas ng sistema sa pamamahala ng baha, pagbibigay ng malinis na tubig, at maayos na pangangasiwa ng likas na yaman upang mas ligtas ang mga pamilya at mas matatag ang gastusin.
Ngunit, ayon kay Cuna, hindi sapat na pamahalaan lamang ang kikilos, kaya’t mahalaga ang sama-samang pagtutulungan ng bawat mamamayan para sa kapakanan ng kalikasan.
“Isang oras lamang—ngunit kapag sama-sama, ibig sabihin nito ay mas kaunting konsumo ng enerhiya, mas kaunting pasanin sa kalikasan, at isang hakbang tungo sa pagprotekta ng ating mga tahanan at kinabukasan,” saad ni Cuna.
Una nang sinabi ni Antipolo Bishop Ruperto Santos na ang isang oras ng kadiliman ay maaaring maging liwanag ng pag-asa na magtutulak sa mas malalim na pagninilay, tunay na pagbabagong-loob, at konkretong pagkilos para sa kalikasan.
Taunang ipinagdiriwang ang Earth Hour bilang bahagi ng pandaigdigang kampanya para sa enerhiya at kalikasan, na naglalayong himukin ang publiko at pamahalaan na maging mas responsable sa paggamit ng kuryente at pangangalaga sa kapaligiran.
Ika-18 taon na ng pakikibahagi ng Pilipinas sa Earth Hour, na unang isinagawa noong 2007 sa Sydney, Australia, at ngayo’y ipinagdiriwang sa mahigit 185 bansa at lugar sa buong mundo bilang simbolo ng sama-samang pagkilos para sa kalikasan.
