3,253 total reads
Nagpaabot ng taos-pusong pasasalamat ang Diocese of Bangued kay Bishop Leopoldo C. Jaucian, SVD, D.D. para sa halos dalawang dekada nitong mapagmahal na paggabay at tapat na paglilingkod sa Simbahan at sambayanan ng Abra.
Sa isang pahayag na inilabas nitong Nobyembre 11, 2026, hinikayat ni Rev. Fr. Liberato O. Ortega, Diocesan Administrator ng Diocese of Bangued, ang mga mananampalataya na patuloy na ipanalangin si Bishop Jaucian, kasunod ng pagtanggap ni Pope Leo XIV sa kanyang pagbibitiw bilang obispo dahil sa mga kadahilanang pangkalusugan.
Matatandaang, inanunsiyo noong Nobyembre 7, 2026 ang desisyon ng Santo Papa na pagtanggap sa pagbibitiw sa katungkulan ni Bishop Jaucian bilang pastol ng diyosesis.
Sa pahayag ni Fr. Ortega, pinangunahan ng Pari ang pagkilala ng diyosesis sa naging mahalagang papel ni Bishop Jaucian sa paggabay sa lokal na Simbahan sa loob ng halos dalawampung taon.
Hiniling din ng Diocese of Bangued sa mga mananampalataya na ipagdasal ang paggaling, kapanatagan at lubos na pagbabalik ng kalusugan ni Bishop Jaucian.
“On November 7, 2026, it was announced that our Holy Father, Pope Leo XIV, has accepted the resignation of our beloved shepherd, the Most Rev. Leopoldo C. Jaucian, SVD, D.D., due to health reasons. With grateful hearts, we thank Bishop Jaucian for nearly twenty years of loving guidance and devoted service to the Church in Abra. Let us continue to keep him in our prayers, asking the Lord to grant him healing, comfort, and a full recovery.” Bahagi ng panawagan ni Fr. Ortega.
Binigyang-diin ng Simbahan na ang pagkilala at pasasalamat sa mga pastol na nag-alay ng kanilang buhay sa paglilingkod ay bahagi ng pagkakaisa ng sambayanang Kristiyano, kung saan sa panahon ng karamdaman at pagbabago sa pamumuno, mahalaga ring ipakita ang malasakit sa pamamagitan ng panalangin at patuloy na pakikiisa sa buhay at misyon ng Simbahan.
