848 total reads
Banal na Oras para sa kalikasan: Earth hour 2026 special, tampok sa Radyo Veritas
Muling makikibahagi ang kapanalig na himpilan sa pagdiriwang ng Earth Hour ngayong taon bilang pakikiisa sa panawagang pangalagaan at bigyang-pahinga ang inang kalikasan.
Isasagawa ngayong Sabado, March 28, 2026, mula alas-8:00 hanggang alas-10:00 ng gabi ang programang “Ang Banal na Oras para sa Kalikasan: Earth Hour 2026 Special,” ng Radyo Veritas, sa pakikipagtulungan ng Climate Change Commission (CCC), Conference of Major Superiors in the Philippines (CMSP), Catholic Bishops’ Conference of the Philippines-Episcopal Commission on Indigenous Peoples (CBCP-ECIP), Diocese of Lucena—Ministry on Ecology, at Alyansa Tigil Mina (ATM).
Tampok sa programa ang sabay-sabay na pagpapatay ng mga ilaw mula alas-8:30 hanggang alas-9:30 ng gabi, na sasabayan ng pagdarasal ng Santo Rosaryo, at mga talakayan hinggil sa kalagayan ng iba’t ibang sektor na apektado ng suliranin sa kapaligiran.
Kabilang sa mga panauhin sina CCC Commissioner Rachel Anne Herrera; Lucena Ministry on Ecology Director, Fr. Warren Puno; CBCP-ECIP Executive Secretary Tony Abuso; at ATM Chairperson Rene Pamplona.
Mapapakinggan ang programa sa DZRV 846 AM at mapapanood sa DZRV846 Facebook page, Veritas PH YouTube channel, at Veritas TV Sky Cable Channel 211.
Ika-18 taon na ng pakikibahagi ng Pilipinas sa Earth Hour, na unang isinagawa noong 2007 sa Sydney, Australia, at ngayo’y ipinagdiriwang sa mahigit 7,000 lungsod at 193 bansa sa buong mundo bilang simbolo ng sama-samang pagkilos para sa kalikasan.
