637 total views
Nanawagan si Novaliches Bishop-emeritus Teodoro Bacani Jr. sa mga mambabatas na gawing sentro ng kanilang pamumuno ang pakikinig sa salita ng Diyos at ang tapat na paglilingkod sa kapwa.
Sa kanyang homiliya sa isinagawang misa sa House of Representatives, iginiit ng obispo na ang tunay na karunungan ay hindi nasusukat sa kayamanan, talino, o dami ng titulo, kundi sa kakayahang makinig at sumunod sa kalooban ng Diyos.
“Sino ang marunong, sino ang nagpapakita ng karunungan ng Panginoon? Hindi ang pinakamayaman, hindi yung pinakamagaling sa mathematics o sa Science, kundi yung mga nakikinig sa salita ng Diyos. At iyan po ang tunay na karunungan ang pakinggan ang salita ng Diyos. Sundin natin ang Kaniyang utos,” bahagi ng homiliya ni Bishop Bacani.
Binigyang-diin ni Bishop Bacani na sa buhay, walang mahalagang bagay ang madaling nakakamtan nang hindi dumaraan sa sakripisyo at hirap. Aniya, mas mahirap ang maglingkod kaysa ang paglingkuran, ngunit ito ang landas tungo sa tunay na kadakilaan.
Dagdag pa ng obispo,”Ganyan din sa ating buhay, ang paglilingkod ay mas mahirap kaysa sa ikaw ay paglingkuran. Ngunit alam Ninyo ang sabi ng Panginoon, ang daan sa kadakilaan ay nasa paglilingkod, hindi sa pagkakamal ng kayamanan, hindi sa pagkakaroon ng maraming titulo, pagkakaroon ng katanyagan kundi nasa paglilingkod. ‘yan ang tunay na karunungan.”
Ipinaalala rin ng obispo na ang Sampung Utos ng Diyos ay nagsisilbing gabay upang maipakita ng bawat isa ang kanilang paglilingkod sa Diyos at pagmamalasakit sa kapwa.
Sa gitna ng pagninilay ngayong panahon ng Kuwaresma, hinimok ni Bacani ang mga lider at mamamayan na muling ituon ang kanilang buhay sa Panginoon, na ang hangarin ay ang tunay na kapakanan at kaligayahan ng bawat tao.
“At ang 10 Utos ng Diyos, ay paraan para ipakita natin na naglilingkod tayo sa Diyos at naglilingkod sa kapwa…sa panahon sana ng Kuwaresma na ito, tandaan natin yan. Let us turn to the Lord who desires only our happiness,” ayon pa kay Bishop Bacani.
