28,460 total reads
Nagbukas ng community pantry ang Redemptorist Legazpi Mission Community upang tumulong sa mga driver ng jeep na apektado ng patuloy na pagtaas ng presyo ng langis.
Tinagurian itong “Manong Para! Sainyo Po Ito,” na layuning maibsan ang araw-araw na pasanin ng mga tsuper na nahihirapang kumita ng sapat para sa kanilang pangangailangan.
“”Manong Para! Sainyo Po Ito” Redemptorist Legazpi Community Pantry.” Ayon sa Redemptorist Legazpi Mission Community.
Ayon sa mga tagapag-organisa, tugon ang programa sa patuloy na krisis na kinahaharap ng sektor ng transportasyon, partikular ang mga umaasa sa arawang pasada para sa kabuhayan.
Hinikayat din ng grupo ang publiko na makiisa sa pamamagitan ng pagbibigay ng donasyon, at binigyang-diin na kahit maliit na tulong ay malaking bagay upang mapanatili ang operasyon ng community pantry at mas marami pang tsuper ang matulungan.
Tumatanggap din ng in-kind donations na maaaring ihulog sa mga nakatalagang kahon sa loob ng simbahan o dalhin sa community pantry malapit sa pasukan ng Redemptorist Church Legazpi sa Lakandula Drive, Barangay Gogon, Legazpi City.
“You may also drop your cash or in-kind donations in the designated box inside our church or at our community pantry near the Church Entrance at Redemptorist Church Lakandula Drive, Brgy. Gogon, Legazpi City, Albay (052) 480-9475.” Bahagi ng paanyaya ng Redemptorist Legazpi Mission Community.
Bukas ang community pantry araw-araw mula alas-4:00 hanggang alas-5:00 ng hapon bilang patuloy na tanda ng malasakit at pakikiisa ng Simbahan sa mga apektado ng krisis.
