29,164 total views
Napapanahon ng mamulat ang mga Pilipino sa ibobotong kandidato na may malinis na pamamahala at intensyon para sa pamayanan.
Inihalimbawa ni Dr.Geoffrey Ducanes, director ng Ateneo Center for Economic ng Ateneo de Manila University ang flood control project scam na kinasasangkutan ng mga inihalal na mambabatas, kaalyadong kontraktor at opisyal ng DPWH.
Iginiit ni Ducanes na negatibo ang epekto ng katiwalian at korapsyon sa ekonomiya ng Pilipinas.
Ipinaliwanag ni Ducanes na dahil sa katiwalian ay bumababa ang investment at pagtatayo ng mga negosyo.
Nilinaw ng director ng Ateneo Center for Economics na kapag laganap ang katiwalian ay mababa ang koleksyon sa buwis at naaantala ang pag-unlad ng bayan dahil sa hindi maayos at tinipid na materyales sa paggawa ng mga imprastraktura.
Sa pag-aaral ni Ducanes, 20-percent ng national budget ay napupunta lamang sa corruption sa halip na magamit sa serbisyo publiko.
“So halimbawa po ang estimated budget is 7-trillion pesos so mga 1.4-trillion piso kung 20% will go to corruption, so napakalaking pera po nito, ang dami pong magagawang imprastraktura, ang dami pong social services na mapo-provide kung magagamit sana itong pondong ito ng tama,” ayon pa sa panayam kay Ducanes.
Ibinahagi din ng opisyal ng ACERD ang Corruption Perceptions Index noong 2024 kung saan pang-114 ang Pilipinas sa 180-mga bansa na talamak ang katiwalian.
Sa pagbisita ni Pope Francis noong 2015 sa Pilipinas, hinimok nito ang mga lider ng Pilipinas na iwaksi ang korapsyon sa halip ay paigtingin ang paglilingkod sa mga Pilipino.
