46,052 total reads
Binigyang-diin ni Cáceres Archbishop Rex Andrew Alarcon ang responsableng paggamit ng artificial intelligence o AI sa media ministry, kasabay ng panawagang manatiling nakatuon sa dignidad ng tao ang pag-unlad ng teknolohiya.
Ito ang naging mensahe ni Archbishop Alarcon, chairman ng Catholic Bishops’ Conference of the Philippines- Episcopal Commission on Social Communications (CBCP-ECSC), sa kanyang keynote address sa 2nd Cebu Metropolitan Catholic Mass Media Congress.
Nakatuon ang pagtitipon sa paggamit ng AI sa media ministry at sa gampanin ng mga Catholic communicator sa mabilis na pagbabago ng digital media sa temang “To Work and to Take Care: Human Dignity at the Heart of AI Innovation in Media Ministry.”
Ayon kay Archbishop Alarcon, maaaring gamitin ang teknolohiya upang maghatid ng kabutihan, katotohanan at pag-asa, nang may pananagutan at paggalang sa bawat tao.
“A groundswell begins where we cannot see it. It begins beneath the surface. And perhaps that is how much of Christian communication works… Someone who was discouraged found hope. Someone who felt alone felt remembered. Someone who had become cynical saw goodness. Someone who was searching caught a glimpse of Christ,” ayon sa mensahe ni Archbishop Alarcon.
Mahalaga ayon sa arsobispo ang komunikasyon ay hindi lamang tungkol sa pagpapalaganap ng impormasyon, kundi ay dapat din itong makatulong sa pag-unawa sa katotohanan, makapagbigay ng pag-asa sa mga nangangailangan at makapaglapit sa mga tao kay Kristo.
Binigyang-diin din ng arsobispo na kahit sa simpleng mensahe ng malasakit ay maaaring magkaroon ng malaking epekto, tulad ng pagbibigay ng pag-asa sa taong pinanghihinaan ng loob at pagpaparamdam na hindi siya nag-iisa.
Panawagan pa ni Archbishop Alarcon ang pagtutulungan ng mga Catholic communicator upang makabuo ng mas malawak na pagkilos sa media na nakaugat sa kabutihan, katotohanan at pananampalataya.
