922 total views
Pinuri ng Oceana Philippines ang hakbang ng Department of the Interior and Local Government (DILG) hinggil sa pagpapatupad ng mga panuntunan at batas hinggil sa wastong pangangalaga sa kalikasan.
Sa inilabas na DILG Memorandum Circular No. 2022-018, nakasaad dito ang muling pagpapaalala sa mga lokal na pamahalaan na ipatupad sa mga kinasasakupan ang mga batas at alituntuning sakop ng Philippine Environmental Impact Statement System (PEISS) Act.
Kabilang na rito ang mga proyektong mapanganib sa kapaligiran tulad ng mga pagtatambak sa mga karagatan at iba pang bahagi ng katubigan, tulad ng bakawan, bahura at pangisdaan.
Ayon kay Oceana Philippines Vice President Atty. Gloria Estenzo Ramos, maituturing na tagumpay ang pagpapatupad ng nasabing kautusan dahil mapapangalagaan nito ang kapakanan at karapatan ng mga mangingisdang naninirahan sa mga baybaying komunidad, gayundin ang kaligtasan ng mga karagatan laban sa mga mapaminsalang proyekto.
“Tinugunan din nito ang pananagutan ng mga pambansang ahensya at lokal na pamahalaan na tiyaking buo at masinsin ang pagpaplano at isinangguni sa mga mamamayan bago pahintulutan ang mga nasabing proyekto,” pahayag ni Estenzo Ramos.
Iginigiit din sa memorandum ng DILG na ang anumang paglabag ng lokal na pamahalaan ay papatawan ng kaukulang parusa tulad ng administratibo, sibil at kriminal sa ilalim ng mga umiiral na batas.
Inihayag ng Kanyang Kabanalan Francisco sa kanyang Laudato Si’ na mahalaga ang pagiging mapagmatyag ng komunidad upang matiyak na wasto at may moral na pamantayan ang pamahalaan sa pagpapatupad ng mga batas hinggil sa pangangalaga sa kalikasan.
