30,426 total views
Inaanyayahan ng Diocese of Assisi sa Italy ang lahat ng mananampalataya sa buong mundo na makibahagi sa makasaysayang Canonization ni Blessed Carlo Acutis sa darating na Setyembre 7 sa St. Peter’s Square, Vatican.
Ang buong seremonya ay mapapanood sa iba’t ibang live at broadcast platforms, kabilang ang mga screen na ilalagay sa loob ng Shrine of the Renunciation sa Assisi.
Sa opisyal na pahayag ng Diyosesis, binigyang-diin nito: “On the occasion of the canonization of Carlo Acutis, scheduled for Sunday, September 7th in St. Peter’s Square starting at 10:00 a.m., the Shrine of the Renunciation in Assisi will broadcast live from Rome on several screens located inside the Shrine.”
Bilang bahagi ng paghahanda, ipinaalala rin ng Diyosesis sa mga media personnel na ang Sala Vicari ng Bishops’ Palace sa Assisi ang magsisilbing headquarters para sa kanilang operasyon. Dagdag pa rito, hanggang Setyembre 6 ang huling araw ng aplikasyon para sa accreditation sa ilalim ng Social Communications Ministry.
Matapos ang canonization, magsisimula ang isang buwang serye ng thanksgiving masses simula Setyembre 8 sa Roma, na pangungunahan ni Cardinal Marcello Semeraro, Prefect of the Dicastery for the Causes of Saints. Sa parehong araw, gaganapin din ang isang misa sa Church of Santa Maria Maggiore sa Assisi sa pangunguna ni Bishop Domenico Sorrentino ng Diocese of Assisi – Nocera Umbra – Gualdo Tadino at Foligno.
Ayon sa pahayag: “On Monday, September 8th, the Mass of Thanksgiving presided over by the Bishop… will begin at 6:00 p.m. in the Church of Santa Maria Maggiore – Shrine of the Renunciation in Assisi.”
Ang mga misa ng pasasalamat ay magpapatuloy sa iba’t ibang simbahan sa Roma at Italy hanggang Oktubre 12, ang mismong kapistahan ni Blessed Carlo Acutis.
Matatandaang naantala ang canonization mula sa orihinal na petsa nitong Abril 27, 2025, bunsod ng pagpanaw ni Pope Francis noong Abril 21.
