23,014 total reads
Nanawagan ang isang opisyal ng Catholic Bishops’ Conference of the Philippines sa bawat mamamayan na patuloy na pangalagaan ang kalikasan lalo na ang mga likas na yaman na ipinagkaloob ng Panginoon sa sanlibutan.
Nagbabala si Military Ordinariate of the Philippines Bishop Oscar Jaime Florencio na ang paglapastangan sa kalikasan ay magdudulot ng panganib sa buhay at kabuhayan ng mamamayan tulad ng iniwang pinsala ng bagyong Tino at Uwan.
Inihalimbawa ng Obispo ang pangangalaga sa kabundukan ng Sierra Madre na itinuturing na isa sa mga pangunahing nagprotekta sa bansa laban sa mas matinding pinsala na maaring naidulot ng Super Typhoon Uwan lalo na sa hilagang Luzon na ngayon ay unti-unting sinisira ng pagmimina, illegal logging, at mapinsalang tulad ng kaliwa dam.
Ayon kay Bishop Florencio, kung hindi dahil sa Sierra Madre ay maaaring mas matindi pa ang maranasang epekto ng Super Typhoon Uwan sa mga madaraanan nitong lalawigan.
Paliwanag ng Obispo, may dahilan at layunin ang Panginoon sa pagkakaloob ng iba’t ibang likas na yaman sa sanlibutan kaya naman marapat lamang na magkaisa ang lahat upang sama-samang mapangalagaan ang mga biyaya ng Panginoon sa sangkatauhan.
“Sana nasa mabuti ng kalagayan after the typhoon Uwan. Ang dalangin ko po ay sana sama-sama tayong mangalaga sa kalikasan, sa Sierra Madre na iyan. Siya po ang isa sa mga dahilan na nalusaw ang Bagyong Uwan dahil kung hindi sa kanya baka malaki pa ang pinsala sa atin. Ito ay bigay sa atin ng Panginoon, meron purpose ang Diyos sana sama-sama natin pangalagaan ang bundok na ito.” Bahagi ng pahayag ni Bishop Florencio sa Radyo Veritas.
Hinimok naman ng Obispo ang lahat na magnilay sa mga pagkukulang ng bawat isa sa pangangalaga sa kalikasan at magkaroon ng “ecological conversion” o pagbabagong-loob tungo sa mas malalim na paggalang, pagpapahalaga at pag-ibig sa kalikasan.
“Sana kung meron man tayong mga ginawa against sa ating kalikasan magkaroon sana tayo ng ecological conversion, upang mabigyan din ng respeto ang atin environment na minsan mangiyakiyak dahil sa hindi natin pag-aalaga.” Dagdag pa ni Bishop Florencio.
Binigyang-diin din ni Bishop Florencio na ang pagmamahal sa kalikasan ay bahagi ng pananampalataya, at ang pangangalaga rito ay isang tugon sa pagmamahal ng Diyos sa Kanyang nilikha.
Ang kabundukan ng Sierra Madre ay may haba na humigit-kumulang 540 kilometro, na umaabot sa silangang bahagi ng Luzon mula Cagayan hanggang Quezon, kung saan sa hilagang bahagi nito matatagpuan ang Northern Sierra Madre Natural Park, na siyang pinakamalaking protektadong lugar sa buong Pilipinas.
