12,688 total reads
Binigyang-diin ni Caritas Manila Executive Director Father Anton CT Pascual ang kahalagahan ng pagkakaisa ng Simbahan, pamahalaan, civil society, pribadong sektor, at iba pang sektor ng lipunan para matugunan ang kalagayan ng mga migranteng apektado ng mga nangyayari sa mundo at kawalan ng oportunidad.
Ayon kay Father Pascual, sa pamamagitan ng tunay na pagsusulong ng pagkakaisa ng iba’t ibang sektor, dapat mabigyan ng pagkakataon ang mga migranteng magkaroon ng magandang kinabukasan, lalo na ang mga Pilipinong mula sa mga probinsya na nagtutungo sa Metro Manila dahil sa kakulangan ng oportunidad.
Iginiit ng pari ang pangangailangang paunlarin ang mga probinsya sa Luzon, Visayas, at Mindanao upang magkaroon ang mga mamamayan ng sapat na oportunidad sa kanilang sariling lugar.
Kabilang dito ang pagpapalawak ng educational at economic opportunities, lalo na sa mga probinsya, upang makatulong sa paglikha ng mas magandang kinabukasan para sa mga Pilipino at migranteng naghahanap ng mas maayos na buhay.
“Tayo po ay sama-samang nagkakaisa ang simbahan, ang gobyerno, ang civil society, pribadong sektor, at ang buong mundo sa pagbibigay ng atensyon sa mga taong biktima ng mga nangyayari sa ating mundo tulad ng migration at dahil sa kawalan ng oportunidad. Kaya nawa sa pamamagitan ng ating sama-samang pagkilid o solidarity, ika nga, solidarity, all sectors, mabigay natin ng pagkakataon na magkaroon ng magandang kinabukasan ang mga migrants all over the world, lalo na sa Pilipinas, ang mga mahihirap na nasa probinsya na nagtamatambak sa Metro Manila. Kaya kailangan paunlarin natin ang probinsya, Luzon, Visayas, Mindanao, at mabigay sila ng oportunidad, educational opportunity, economic opportunity, lalo-lalo na sa probinsya,” ayon sa mensahe ni Fr.Pascual sa panayam ng Radyo Veritas.
Ang panawagan ni Father Pascual ang kaugnay ng paggunita ngayong araw sa 112th World Day of Migrants and Refugees ng Simbahan, na may temang “Even just one of these children”.
