9,468 total views
Nakikiisa ang Alyansa Tigil Mina (ATM) sa sambayanang Pilipino sa paggunita ng ika-39 anibersaryo ng EDSA People Power Revolution.
Ayon sa ATM, kaakibat ng pagdiriwang ng kasarinlan ng bansa mula sa diktadurya ay ang pagpapahayag ng patuloy na paninindigan sa pagtatanggol ng karapatan at kalayaan, gayundin sa pagsusulong ng mga adhikain ng mga nasa laylayan ng lipunan.
Iginiit ng grupo na mahalagang ipaalala sa kasalukuyan at sa susunod pang henerasyon ang nagkakaisang pakikipaglaban sa pang-aapi ng estado, paglabag sa karapatang pantao, at pandarambong sa ekonomiya, sa gitna ng pagbabago sa kasaysayan kung saan may mga pagtatangkang burahin ang tagumpay ng bayan sa pagpapaalis sa yumaong diktador na si Ferdinand Marcos, Sr.
“We must not forget EDSA that we may continue our fight against the oligarchy, where political and economic power is wielded by oppressive political dynasties and big business,” pahayag ng ATM.
Dagdag ng ATM, dapat alalahanin ang mapayapang rebolusyon upang patuloy na itaguyod ang paglaban sa katiwalian at mapaminsalang pagsasamantala sa likas na yaman at mga tagapagtaguyod nito.
Panawagan ng grupo na sa paggunita ng EDSA People Power Revolution ay mahikayat ang lahat na ipagpatuloy ang adhikain para sa katarungang panlipunan at pagkakapantay-pantay, karapatang pang-ekonomiya at kalayaan, pangangalaga sa kalikasan, at katarungang pangklima.
“We call on all sectors of Philippine society to keep alive and thriving the EDSA Spirit. EDSA did not happen overnight; neither will the victory of our just causes. But we must persist with the fervent hope that we will prevail — may the EDSA People Power Live on!,” ayon sa grupo.
Noong Pebrero 1986, sa harap ng mga tangke at sundalo, nagtipon sa EDSA ang mga mamamayan mula sa iba’t ibang antas ng lipunan, kasama ang mga lingkod ng Simbahan, at nagkaisa sa pananalangin at mapayapang pagkilos upang muling makamit ang demokrasya ng bansa mula sa diktadurya sa ilalim ng rehimen ni Pangulong Marcos Sr.
Batay sa tala ng Amnesty International, mahigit 34,000 Pilipino ang nakaranas ng pang-aabuso at iba’t ibang uri ng karahasan noong panahon ng Batas Militar, bukod pa rito ang tinatayang 70,000 ikinulong at mahigit 3,200 pinaslang sa maituturing na pinakamadilim na yugto ng kasaysayan ng Pilipinas.
