366 total views
Hindi dapat mabahala ang publiko sa ulat na nag-pull-out ng kanilang investments sa Pilipinas ang mga foreign fund managers na naging sanhi ng pagtamlay ng stock na hinihinalang dahilan ay ang kampanya ng administrasyong Duterte laban sa ilegal na droga kung saan maraming kaso ng extrajudicial killings.
Ayon kay Astro del Castillo, stock market at securities analyst, nakakaalarma ang artikulo kaya’t ipinaliwanag nito na ang mga nagaganap sa ibang bansa gaya sa Amerika na pagtaas ng kanilang interest rate ang dahilan.
“Alarming ang article, i-clarify ko lang, karamihan ng merkado medyo matamlay dahil sa kaganapan abroad dahil sa posibleng pagtaas ng interest rate sa Amerika, gumaganda nga ang ekonomiya nila pero ang mga fund managers kailangang mag-adjust, pag umaakyat ang interest rate sa Amerika, magsi-shift ang pondo from the stock market to the bond market slowly, kung makikita ninyo di lang bansa natin ang medyo tumamlay pati ibang merkado,” ayon kay del Castillo sa panayam ng Radyo Veritas.
Sa halip, iginiit pa ni del Castillo na sa kasalukuyan mas tumaas pa ang kumpiyansa ng mga foreign investors gaya sa usapin ng turismo na dumagsa pa ngayon.
“Sa tingin ko halos wala naman, mas mataas ang kumpiyansa ngayon kung titingnan ninyo ang mga hotels halos fully-booked dahil sa mga bisita na may interest pa rin sa bansa, makikita natin yan after several months, for the meantime during this period lalo na katatapos lang ng August o yung tinatawag na ghost month, expected na mahina talaga ang merkado hopefully itong September looking forward medyo things will be better,” pahayag pa ni del Castillo.
Naniniwala rin si Del Castillo na walang kinalaman ang usapin ng peace and order sa bansa lalo na ang sinasabing extrajudicial killings sa pag-pull-out ng ibang stocks na bagama’t ang mga ito ay mga portfolio investments lang o yung mga panandaliang kapital.
“Yes yes, I’m pretty confident kasi every time we mingle with other fund managers-investors hindi naman nadi-discuss o nare-relate ang reaction ng merkado sa nangyayaring Extrajudicial Killings or war on drugs, however ibang usapin yun, ang tingin ng investors the government is putting the house in order and kailangan ng mga tao na isumbong ang mga nagco-commit ng mali sa isang programang gusto talagang ibalik ang peace and order sa ating bansa, and mga hot money lang naman ito.Mga portfolio investment lang ito, mga panandilaang capital, pero yung nakikita nating fundamental at mga interest ng investors andito pa rin, kung makikita ninyo pati piso humina, nag aadjust talaga ng merkado, yung langis the past few weeks tuloy-tuloy ang pag akyat niya so talagang nagkakaroon ng adjustments ang mga foreign fund managers,” ayon pa sa stock analyst.
Napaulat nitong nakaraang linggo ang pag pull-out ng pera sa Pilipinas ng mga foreign fund managers na naging sanhi ng pagbagsak ng stock na sinasabing karagdagang investments ito sa bansa na $276 billion equity market sa ilalim ng administrasyong Duterte.
