289 total views
Hindi nagwawakas sa pagtatapos ng Pilgrimage Season 2026 ng Diocese of Antipolo ang paglalakbay ng pananampalataya ng mga deboto sa Our Lady of Peace and Good Voyage.
Sa closing ng pilgrimage season 2026, hinikayat ni Antipolo Bishop Ruperto Santos ang mga mananampalataya na dalhin sa kanilang mga tahanan, pamayanan, at pang araw-araw na pamumuhay ang mga aral, panalangin, pagpapatawad, at pag-asa na kanilang naranasan sa paglalakbay sa International Shrine of Our Lady of Peace and Good Voyage upang maranasan din ng iba ang pag-ibig at biyaya ng diyos.
“Nagtatapos na po, Hindi po ibig sabihin nito ay sarado na, Hindi po ibig sabihin nito ay hindi na puwedeng pumunta, ito pa ang simula, kung saan ay ilalakip natin dito ang ating mga natutunan,” ayon sa panayam ng Radyo Veritas kay Bishop Santos.
Inihayag ng Obispo na ang bawat deboto ay tinatawagan na maging saksi ng kanilang karanasan sa Panginoon sa pamamagitan ng pagbabahagi ng kanilang natanggap na biyaya sa kapwa at pag-akay sa iba na makiisa sa buhay ng Simbahan.
Lubos namang pinasalamatan ni Bishop Santos ang mga deboto, mga volunteer, at mga tumulong sa matagumpay na pagdaraos ng Pilgrimage Season, kabilang ang mga nag-alay ng kanilang panahon, kakayahan, at yaman upang maparangalan ang Mahal na Birheng Maria
“Tayo po ay babalik sa tao, sa ating bahay, sa ating bayan, upang sa ganoon, lahat ng ating naranasan, ang istorya ng ating paglalakbay, ang istorya ng ating Panginoon na nasa Sakramento, ang biyayang ating tinanggap, ang pagpapatawad na ating nasaksihan, at ang naramdamang kaligtasan na sumaatin ay ating ibabahagi, ating iaalay, at ating ihahandog sa ating kapwa,” bahagi pa ng panayam ng Radyo Veritas kay Bishop Santos.
Umaasa rin ang Obispo na patuloy na mararanasan ng bawat isa ang paggabay at pagpapala ng Birhen ng Antipolo, habang ipinapanalangin ang kapayapaan ng pamayanan at kaligtasan ng lahat sa kabila ng mga bantang kalamidad.
Pinangunahan ni Archbishop Brown ang Closing of the Pilgrimage Season 2026 kasama si Antipolo Bishop Ruperto Santos at mga Kaparian ng Diocese of Antipolo.
