12,693 total reads
Inihayag ni Pangulong Ferdinand Marcos Jr. na ipapaubaya na sa Tanggapan ng Ombudsman ang pagsasagawa ng imbestigasyon kay dating ako Bicol Party-list Rep. Zaldy at dating House Speaker Martin Romualdez, kaugnay ng maanomalyang flood control projects.
Sinabi ng punong ehekutibo na ang lahat ng nakuhang impormasyon ng Independent Commission on Infrastructure at Department of Public Works and Highways ay ibibigay sa Ombudsman para imbestigahan ang pagkakaugnay sa mga paratang.
“At kaya ngayon, ay nais kong ipaalam sa ating mga kababayan na ang ICI at saka ang DPWH ay lahat ng nakuha nila na impormasyon, ay irerefer, ibibigay na sa Ombudsman para imbestigahan ng Ombudsman,” ayon kay Pangulong Marcos.
Sinabi pa ng Pangulo na sakaling may ebidensya at mapatunayan ay maaring makasuhan sina Co at Romualdez.
Dagdag pa ni Marcos, “Pag nakita lahat ng ebidensya, baka magfile ng kaso ng plunder o anti-graft o indirect bribery. Malakas naman ang loob natin na yung Ombudsman ang ginagawa lamang ay sumusunod sa ebidensya, at kung saan tayo dinadala ng ebidensya, doon pupunta ang ating imbestigasyon.”
Sa kasalukuyan ay nanatiling nasa labas ng bansa si Co, habang una na ring humarap si Romualdez sa ICI, kamakailan.
Si Co ay kabilang din sa unang sinampahan ng kaso ng Ombudsman sa Sandiganbayan, kabilang ang ilang dating opisyal ng DPWH alinsunod na rin sa rekomenasyon ng ICI.
Matatandaan ding tinuran ni Co sa kaniyang posted video sa social media si Romualdez at Pangulong Marcos na may kinalaman sa sinasabing P100 B ‘insertion’ sa 2025 budget.
Naglabas naman ng pahayag ang Catholic Bishops Conference of the Philippines (CBCP) sa posibleng paggamit sa pulitika ng mga paratang ni Co, kaugnay sa anomalya.
Hinimok ng mga obispo si Zaldy Co na bumalik sa Pilipinas at isumite ang kanyang mga paratang sa tamang ahensya, nang may panunumpa at sapat na ebidensya bilang suporta.
Samantala, nagbitiw na rin sa posisyon sina Executive Secretary Lucas Bersamin at Budget Secretary Amenah Pangandaman, na kabilang naman sa nabanggit ni dating DPWH Usec. Roberto Bernardo sa isinasagawang pagdinig ng Senate Blue Ribbon Committee.
