9,898 total views
Hinikayat ng BAN Toxics ang mga mananampalatayang Pilipino na isabuhay ang pangangalaga sa kalikasan kasabay ng taimtim na paggunita ng Semana Santa ngayong 2026.
Ayon sa grupo, sa gitna ng tumataas na presyo ng enerhiya, umiigting na tunggalian sa iba’t ibang panig ng mundo, at patuloy na epekto ng krisis sa klima, mahalagang isaalang-alang ang mga simpleng hakbang na mangangalaga sa kalusugan ng tao at kapaligiran.
“In these challenging times, BAN Toxics calls on all Filipino faithful to choose actions that safeguard both human health and the environment—simple yet meaningful acts of care that matter now more than ever,” ayon sa grupo.
Binigyang-diin ng BAN Toxics na kasabay ng pagpasok ng tag-init ay ang matinding init na nararanasan sa bansa, na malinaw na indikasyon ng lumalalang climate crisis.
Sa datos ng Philippine Atmospheric, Geophysical and Astronomical Services Administration, umabot sa 52°C ang heat index sa ilang bahagi ng bansa noong nakaraang taon, habang inaasahan pang mas matinding init sa mga susunod na buwan ng Abril at Mayo.
Dahil dito, tumataas din ang konsumo sa enerhiya na nagdudulot ng dagdag na pasanin sa mga pamilyang Pilipino, lalo na sa gitna ng pagtaas ng presyo ng kuryente at kakulangan sa suplay.
Dagdag pa ng BAN Toxics, unti-unti na ring nararanasan ang kakulangan sa suplay ng tubig, lalo na tuwing tag-init at panahon ng El Niño, kung saan tinatayang maaaring humarap ang bansa sa matinding water shortage pagsapit ng 2040 ayon sa World Resources Institute.
“These overlapping crises highlight the urgent need for collective action and more sustainable, mindful use of our resources,” ayon sa BAN Toxics.
Sa kabila nito, iginiit ng BAN Toxics na ang panahon ng Kuwaresma ay hindi lamang para sa panalangin at pagninilay, kundi para rin sa kongkretong pagkilos para sa kapakanan ng kapwa at ng kalikasan.
Kabilang sa mga mungkahi ng grupo ang paggamit ng mga likas at lokal na materyales sa mga simbahan, pag-iwas sa single-use plastics, pagtitipid sa tubig at kuryente, at pagsasagawa ng tamang pamamahala ng basura sa mga aktibidad ng Semana Santa.
Hinimok din ang mga pamilya at manlalakbay na maging responsable sa kanilang mga gawain sa pamamagitan ng paggamit ng reusable na gamit, pagtangkilik sa lokal na produkto, at pag-iwas sa labis na pagkonsumo.
“BAN Toxics stands firm in protecting Filipinos from harmful chemicals and promoting sustainable communities. Amid global instability and environmental challenges, let our faith inspire action, choosing what is just, sustainable, and life-giving for humanity and the earth,” saad ng BAN Toxics.
