8,136 total reads
Binigyang-diin ni Manila Archbishop Jose Cardinal Advincula na hindi maituturing na tunay na kabanalan ang pamumuhay na inilalayo ang isang Kristiyano sa mga dukha at nangangailangan sa halip na ilapit siya sa mga ito sa diwa ng pagmamahal at paglilingkod.
Ito ang naging pagninilay ng kardinal sa Minor Basilica and Metropolitan Cathedral of the Immaculate Conception o Manila Cathedral sa pagdiriwang ng unang kapistahan ni San Pier Giorgio Frassati bilang santo, na inilarawan niya ang Italyanong layko bilang huwaran ng isang Kristiyanong pinagsasama ang malalim na ugnayan sa Diyos at malasakit sa kapwa.
Ayon kay Cardinal Advincula, ang pakikipagtagpo sa Panginoon ay dapat magbunga ng higit na habag sa mga nagdurusa at nasa laylayan ng lipunan.
“If our holiness separates us from the people instead of drawing us closer to them, then it is not the holiness of Jesus,” pagninilay ni Cardinal Advincula.
Ipinaliwanag niya na tulad ni San Pier Giorgio Frassati, ang pag-akyat sa “bundok” ng panalangin, Eukaristiya at mga sakramento ay dapat humantong sa paglilingkod sa mga mahihirap, maysakit, nag-iisa at iba pang higit na nangangailangan.
Binigyang-diin din ng kardinal na walang saysay ang panalangin at pakikiisa kay Kristo kung hindi ito nagiging daan upang maging higit na mahabagin sa kapwa.
“If our prayer does not make us more compassionate, then perhaps we have not truly met the Lord. If our Eucharistic communion does not open our eyes to those who hunger, then we have not truly become one with the Bread of Life,” ayon sa kardinal.
Ibinahagi rin ni Cardinal Advincula ang kanyang mga karanasan sa pagbisita sa mga pamayanang nasa kabundukan ng Ilocos, Capiz at Negros na nagpatibay sa kanyang paniniwalang ang paglapit sa Diyos ay laging humahantong sa mas malalim na pagmamahal sa kapwa.
“Going up to God always means learning to go down to our brothers and sisters with greater love,” dagdag pa ni Cardinal Advincula.
Hinimok naman ng kardinal ang mga mananampalataya, lalo na ang mga kabataan, na tularan ang halimbawa ni San Pier Giorgio Frassati sa pamumuhay ng Beatitudes sa pamamagitan ng araw-araw na panalangin at kongkretong paglilingkod sa mga nasa laylayan ng lipunan.
Sinabi ni Cardinal Advincula na ang sukdulan ng buhay Kristiyano ay hindi ang pag-angat ng sarili kundi ang mapagkumbabang pagyuko upang iahon ang iba matapos makatagpo ang Diyos.
“The true summit of the Christian life is not reached when we stand above others, but when, having encountered God, we bend down in love to lift others up,” ayon kay Cardinal Advincula.
