4,677 total reads
Ipinag-utos ng mga diyosesis sa Bicol Region na buksan ang mga simbahan, kapilya, at iba pang pasilidad sa mga parokya upang magsilbing kanlungan ng mga pamilyang apektado ng binabantayang Severe Tropical Storm Opong.
Hinikayat ni Legazpi, Albay Bishop Joel Baylon ang pagtanggap sa mga magsisilikas sa pamamagitan ng pagbubukas ng mga pasilidad sa mga parokya at ang pagkilos ng Parish Disaster Response Committees (PaDReCom) katuwang ang Diocesan Commission on Social Concerns at Social Action Center.
“Our churches are ready to welcome evacuees during Tropical Storm Opong, where facilities are safe,” ayon sa pahayag ng Diyosesis ng Legazpi.
Samantala, nanawagan naman si Sorsogon Bishop Jose Alan Dialogo ng agarang pagkilos, kabilang ang pagbubukas ng parish halls, kapilya, at paaralan bilang evacuation centers kasabay ang pakikipag-ugnayan sa mga lokal na pamahalaan.
Iginiit ni Bishop Dialogo ang kahalagahan ng kahandaan lalo’t inaasahang magla-landfall ang Bagyong Opong sa Sorsogon bukas.
Sa sirkular, hinikayat ng obispo ang lahat ng parokya, sa pamamagitan ng pakikipag-ugnayan sa mga Vicar Forane, na agad kumilos sa pangunguna ng Commission on Service at Caritas Sorsogon.
Nagbahagi rin ng mga panuntunan si Bishop Dialogo upang magsilbing gabay upang matiyak ang kaligtasan at kahandaan ng simbahan para sa pagtugon at pagtulong.
“These guidelines are temporary measures in the absence of finalized diocesan [Disaster Risk Reduction] protocols… Let us assure our faithful that the Church is both a sanctuary and a service center in this time of trial,” ayon kay Bishop Dialogo.
Bukod sa pagbubukas ng mga parokya para sa mga magsisilikas, hinikayat ni Daet, Camarines Norte Bishop Herman Abcede ang mga mananampalataya na usalin ang Oratio Imperata para sa kaligtasan laban sa kalamidad.
“Let us transform this difficult moment into an opportunity for solidarity and faith. Together, let us be instruments of Christ’s mercy, serving and protecting His flock in times of trial,” saad ni Bishop Abcede.
Nanawagan din ang Diyosesis ng Virac, Catanduanes, sa pangunguna ni Bishop Luisito Occiano, sa sambayanang kristiyano para sa sama-samang pananalangin upang hilingin ang habag at kalinga ng Diyos sa gitna ng pangamba at pagsubok.
“Prayer is our most powerful weapon. In these uncertain times, it is crucial that we turn to God and implore His mercy and protection. Let us come together as one community of faith, united in purpose and spirit, to pray for deliverance from these calamities,” ayon sa pahayag ng diyosesis.
Batay sa huling ulat ng Philippine Atmospheric, Geophysical, and Astronomical Services Administration (PAGASA), napanatili ng Bagyong Opong ang lakas habang kumikilos patungong kanluran sa silangan hilagang-silangan ng Guiuan, Eastern Samar.
Inaasahang dadaan malapit o magla-landfall ang bagyo sa Northern Samar o hilagang bahagi ng Eastern Samar, bukas ng umaga, September 26, bago ito tumungo sa Bicol Region, partikular sa Sorsogon.
