380 total views
Nananawagan sa mamamayan ang Task Force Election 2016 na aktibong makiisa at makilahok sa nakatakdang halalang pambarangay sa darating na Oktubre.
Ito ang panawagan ni Atty. Rona Ann Caritos – Chairperson ng Task Force Election 2016 at Executive Director ng Legal Network for Truthful Elections (LENTE) kaugnay ng dalawang linggong pagbubukas ng Commission on Elections ng registration o pagpapatala sa mga hindi pa nakarehistrong botante partikular na sa mga kabataang unang beses pa lamang makakalahok sa SK at Barangay Elections.
“Nananawagan kami sa lahat ng mga kababayan natin na gustong makilahok at sana makilahok sa darating na Barangay Election sa October 30 na magparehistro na, kasi dalawang linggo lang yung inilaan na oras sa atin ng COMELEC para magparehistro mas lalo kaming nananawagan sa mga kabataan para magparehistro para maging miyembro ng katipunan ng kabataan, kasi 1st time in this Election, in this October Election na i-implement natin yung SK Reform Law,” pahayag ni Atty. Caritos sa Radio Veritas.
Nasasaad sa Republic Act No. 9340 ang pagsasagawa ng Barangay Elections sa darating na Oktubre.
Kapaloob naman sa bagong SK Reform Law na maaring bumoto sa SK ang mga may edad na 15 hanggang 30-taong gulang ngunit ang maaari lamang tumakbo sa SK election ang mga kabataang may edad na 18 hanggang 24-taong gulang.
Matatandaang sa naganap na Encounter with the Youth sa UST, ni Pope Francis noong ika-18 ng Enero, 2015 ay hinamon nito ang mga kabataan na mag-isip, makiramdam at kumilos upang tunay na makapagbahagi sa kapwa, partikular na sa mga nangangailangan at maging sa kapakanan ng buong bayan.
