211 total views
Ipinagtanggol ni Diocese of Cubao Bishop Honesto Ongtioco ang karapatan ng mga urban poor na manirahan sa lungsod.
Ayon kay Bishop Ongtioco, may karapatan ang mga maralitang taga – lungsod na magkaroon ng matinong tirahan na may mga pangunahing pasilidad at pangangailangan na tungkulin ng pamahalaan na tugunan.
Ikinalulungkot lamang ni Bishop Ongtioco na hindi kinikilala ng mismong gobyerno ang batas na hindi lamang basta – bastang paalisin ang mga informal settler nang walang relokasyon.
“That is a very human condition na hindi basta dahil hindi sa kanila ilipat mo na lang tapos sila na ang bahalang mag – survive itong mga tao. So that means may karapatan sila, human condition. Ano yung condition, basic facilities, like electricity, water, education, work, these are basic needs,” pahayag ni Bishop Ongtioco sa panayam ng Veritas Patrol.
Iginiit ni Bishop Ongtioco na hindi makatarungan na ang mga informal settlers ay ipagsawalang – bahala na lamang ng pamahalaan na bunsod nang kawalan ng oportunidad ay hindi makaangat ang pamumuhay.
“Kung minsan basta mailipat lang yun ang concerned ng iba, that’s it. Sila na ang bahala. That is unfair, that is we can do our part. Huwag nating sabihing bahala na sila, kasalanan nila yun kundi inapi sila. Hindi nila kasalanan yun inapi sila kaya hindi umangat ang buhay nila,” giit pa ni Bishop Ongtioco sa Radyo Veritas.
Nauna nang ipinatigil ni Pangulong Rodrigo Duterte ang demolisyon hangga’t walang matinong relokasyon na sinuportahan ni Vice President Leni Robredo.
Nangako naman ang bise presidente na kalihim ng Housing and Urban Poor Development Coordinating Council o HUDCC na ipagpapatuloy nito ang pagpapatayo ng 1.4 na milyong desenteng pabahay sa mga mahihirap.
Magugunitang nakapag – patayo na ng 60 pabahay ang Diyosesis ng Cubao para sa mga empleyado nito upang mabawasan na ang kanilang gastusin.