938 total reads
Binuksan ng Conference of Major Superiors in the Philippines (CMSP) ang 2nd CMSP Convention sa Zamboanga City sa panawagang maging “prophetic witnesses of peace in a wounded world” ang mga consecrated persons sa gitna ng karahasan, kahirapan, migrasyon, at pagkakawatak-watak ng lipunan.
Isinasagawa ang pagtitipon mula September 1 hanggang 5, 2026 sa Grand Astoria Hotel sa Zamboanga City.
Ito ang ibinahagi nina Fr. Angel Cortez, OFM, at Sr. Mila Margaret Montegrejo, Carm. OL, mga co-executive secretary ng CMSP, sa pagbubukas ng pagtitipon na nakatuon sa temang, “Consecrated Persons: Prophetic Witnesses of Peace in a Wounded World.”
Ayon sa mga opisyal ng CMSP, ang convention ay pagkakataon para sa mga major superior, relihiyosong lalaki at babae, mission partners, at iba pang katuwang sa misyon na manalangin, magbuklod, magdayalogo, at sama-samang magnilay.
Binigyang-diin ng CMSP ang panawagan sa mga relihiyoso na maging “leaven of peace and signs of hope wherever Providence may lead” sa gitna ng mga suliraning dulot ng karahasan, kahirapan, pagkasira ng kalikasan, migrasyon, at pagkakawatak-watak ng lipunan.
Ipinaalala rin na ang pagiging propeta ay hindi lamang nakikita sa pagsasalita, kundi sa pamumuhay na naghahayag ng presensya ng Diyos sa panalangin, “self-emptying love,” at bukas-palad na paglilingkod.
Kasabay nito, itinatampok sa convention ang pagpapahalaga sa dignidad ng bawat tao.
“The dignity of every human person is not earned but received as God’s gift. Every human person possesses an inherent dignity that can never be reduced to productivity, status, or usefulness.”
Iginiit ng CMSP na dapat manaig ang pagkakapatiran, pakikilahok, pagkakaisa, at kabutihang panlahat sa mga institusyon at estrukturang panlipunan.
Ibabatay ang convention sa Filipino spiritual framework na MULAT, DAMA, TINDIG, at PAGHAYO upang gabayan ang mga kalahok sa pagkilala sa mga hamon ng lipunan, pakikiisa sa daing at pag-asa ng sambayanan, at matapang na pagsaksi para sa kapayapaan.
Pinili ang Zamboanga City bilang lugar ng pagtitipon dahil sa patuloy na pagtataguyod ng dayalogo at mapayapang pakikipamuhay ng mga Kristiyano, Muslim, at mga Indigenous Peoples.
Inilarawan ng CMSP ang convention bilang “a school of communion and a pilgrimage of hope.”
Magtatapos ang pagtitipon sa Rite of PAGHAYO, kung saan isusugo ang mga kalahok sa kanilang mga pamayanan.
“Renewed in hope and committed to building a more humane, fraternal, and peaceful society.”
