29,299 total views
Itinuturing ni LAIKO National President Francisco Xavier Padilla na biyaya ang kanyang naging personal na pakikipagtagpo kay Pope Leo XIV sa Vatican.
Ayon kay Padilla, isang pambihirang karanasan ang makaharap ang Santo Papa at maipakilala sa punong pastol ng Simbahang Katolika ang misyon, kasaysayan at layunin ng Sangguniang Laiko ng Pilipinas na magdiriwang ng ika-75 taong pagkakatatag ngayong taon.
Pagbabahagi ni Padilla, sadyang kapanapanabik, taimtim at kalugod-lugod ang makadalo sa Papal Audience kung saan kabilang sa kanyang hindi malilimutang karanasan ay ang paglapit ni Pope Leo XIV upang personal na maipakilala at maihandog sa Santo Papa ang 75th LAIKO Anniversary booklet ng Sangguniang Laiko ng Pilipinas.
“It was a blessing to meet His Holiness Pope Leo XIV! Especially on the 75th year of LAIKO. We were able to give him the information about LAIKO – history, etc. It is a special moment to be able to let the head of the Catholic Church know about us! The Papal Audience itself is solemn, fun and exciting all rolled into one. And when Pope Leo is approaching you, it is an experience you’ll never forget.” Pahayag ni Padilla sa Radyo Veritas.
Kaugnay nga nito, puspusan na din ang isinasagawang paghahanda ng Sangguniang Laiko ng Pilipinas para sa nalalapit na paggunita ng ika-75 anibersaryo ng pagkakatatag nito bilang implementing arm ng Catholic Bishops’ Conference of the Philippines-Episcopal Commission on the Laity.
Una na ring inanyayahan ng Sangguniang Laiko ng Pilipinas ang bawat layko sa buong bansa na makiisa sa nakatakdang National Laity Week Celebration 2025 sa susunod na buwan na magsisimula sa ika-27 ng Setyembre, 2025 sa Diyosesis ng Laoag at magtatapos naman sa ika-4 ng Oktubre, 2025.
Tema ng National Laity Week 2025 ang “Empowered Laity Journeying Together as Pilgrims of Hope” na layuning isulong ang pagkakaisa ng mga layko sa pananalangin bilang daluyan ng pag-asa na alinsunod rin sa tema ng nakatakdang paggunita ng 24th Biennial National Convention at ika-75 anibersaryo ng Sangguniang Laiko ng Pilipinas.
Unang inihayag ng implementing arm ng CBCP-Episcopal Commission on the Laity na layunin ng taunang pagsasagawa ng National Laity Week na ipakita at ipadama sa mga layko ang kanilang kahalagahan sa pakikiisa sa misyon ni Hesus.
Ang mga layko ay ang mga binyagan na hindi naordinahan o kabilang sa mga religious congregation na tinatayang bumubuo sa 99.99% ng mga Katoliko sa buong bansa.
