9,067 total views
Nanawagan si Bayombong Bishop Jose Elmer Mangalinao sa mamamayan na magsuot ng puti bilang simbolo ng pagkakaisa at paninindigan para sa malinis at tapat na pamahalaan kasabay ng paggunita sa ika-53 anibersaryo ng deklarasyon ng Batas Militar sa September 21, 2025.
Ayon kay Bishop Mangalinao, ang pagsusuot ng puti sa mga Banal na Misa sa darating na Sabado at Linggo ay tanda ng pagkakaisa laban sa katiwalian at pagsasamantala sa yaman ng bayan.
“Let us be bold in expressing our common disgust against plunderers of our Nation,” pahayag ni Bishop Mangalinao.
Bukod dito, hinikayat din ng obispo ang mamamayan na makiisa sa mga isasagawang pagtitipon at kilos-protesta tulad ng “Trillion Peso March” sa EDSA People Power Monument sa Quezon City at “Baha sa Luneta” sa Luneta Park, Manila City upang ipanawagan ang pananagutan sa pamahalaan.
Binigyang-diin ni Bishop Mangalinao na kailangan ang sama-samang pagkilos ng mamamayan upang igiit ang pananagutan, malinaw at tapat na pamamahala, at makatarungang pagkilos mula sa mga halal na opisyal.
“With faith, hope, and charity, let us demand for a country where governance is transparent; leaders are accountable; and justice is served,” ayon kay Bishop Mangalinao.
Una nang inihayag ng Church Leaders Council for National Transformation—na mangunguna sa Trillion Peso March sa EDSA—na ang layunin ng nasabing pagkilos ay ipanawagan ang pananagutan sa talamak na katiwalian sa pamahalaan, partikular na ang bilyon-bilyong pisong nasayang dahil sa maanomalya at kontrobersiyal na flood-control projects ng Department of Public Works and Highways (DPWH) na kinasasangkutan ng ilang opisyal at contractors.
