9,148 total reads
Nanawagan si Apostolic Vicariate of Puerto Princesa Bishop Socrates Mesiona sa mga mananampalataya na makiisa sa nakatakdang Prayer and Indignation Rally sa bikaryato bilang pagkundina sa laganap na katiwalian sa pamahalaan at lipunan.
Sa pangkalahatang paanyaya ng Obispo na siya ring chairman ng Catholic Bishops’ Conference of the Philippines (CBCP) -Episcopal Commission on Mission ay iginiit nito na ang sistematikong korapsyon o katiwalian na nagaganap sa bansa ay isang malalim na kasalanang moral at tahasang paglabag sa ika-pitong utos ng Diyos na “Huwag kang magnanakaw.”
Ayon sa Obispo, dapat na magsama-sama ang lahat sa pananalangin at pagkundina sa patuloy na pagnanakaw sa kaban ng bayan na isang moral na kasalanan hindi lamang sa batas ng tao kundi maging sa batas ng Diyos.
“Our nation finds itself at a pivotal juncture. The prevalent systemic corruption within our government and society is intolerable. It is imperative that we articulate our justified outrage and advocate for substantial change, just as we seek accountability from those whom we have entrusted with public service. Corruption embodies a profound moral transgression, as denoted by the Seventh Commandment (Thou shalt not steal!). Consequently, we must collectively embrace our duty to denounce such moral depravity.” Bahagi ng paanyaya ni Bishop Mesiona.
Nakatakda ang “Pagpapahayag ng Pagkadismaya: Itigil ang Korapsyon!” Prayer and Indignation Rally ng bikaryato sa ika-21 ng Setyembre, 2025 mula alas-kwatro y medya ng hapon hanggang alas-sais y medya ng gabi sa Seminario de San Jose Open Field, sa Bgy. Tiniguiban, Puerto Princesa City.
Inaanyayahan rin ang lahat na magsuot ng puting damit at magdala ng kandila bilang simbolo ng pagkakaisa at malinis na hangarin para sa pagbabago sa bayan.
“In this spirit, I extend to you an invitation to participate in a Prayer and Indignation Rally on Sunday, September 21, from 4:30 PM to 6:30 PM, at the football field of Seminario de San Jose, located along National Road, Bgy. Tiniguiban, Puerto Princesa City. Let us convey a resolute message to those engaged in corrupt practices that we have reached our limit. Magsuot po kayo ng white t-shirt at magsama-sama po tayo!” Dagdag pa ni Bishop Mesiona.
Giit ng Obispo, napapanahon ng magkaisa ang lahat upang sama-samang ipanalangin at ipakita ang ganap na pagkundina sa patuloy na katiwaliang nagaganap sa bansa.
Samantala ilang mga gawain pa ang nakahanay sa iba’t ibang bahagi ng bansa sa ika-21 ng Setyembre, 2025 na layuning maipakita ang pagkundina ng taumbayan sa patuloy na sistema ng katiwalian na nagaganap sa bansa.
