504 total views
Inanunsyo ng Diyosesis ng Legazpi ang pagdiriwang ng Inang Magayon 2026 na nakatakda sa Mayo 1, 2026 bilang bahagi ng patuloy na tradisyon at debosyon kay Nuestra Señora de Salvacion, bilang Makalangit na Reyna at Patrona ng Albay.
Sa Diocesan Circular No. 10 na inilabas ni Legazpi Bishop Joel Baylon ay inaanyayahan ng Obispo ang mga mananampalataya na makibahagi sa mga gawain, kung saan binigyang-diin ang kahalagahan ng pagdiriwang na nakasentro sa pananampalataya.
Isasagawa ang pagdiriwang ngayong taon bilang bahagi na rin ng Diamond Jubilee ng Diocese of Legazpi, na itinuturing ding Marian Jubilee na isang natatanging panahon ng biyaya para sa lokal na Simbahan.
Sa diwa ng Year of Mission, inaanyayahan ng diyosesis ang lahat na magkaisa bilang isang sambayanan sa pananalangin para sa kapayapaan, paghahandog ng sakripisyo, at panibagong pagtatalaga sa pamumuhay at pagbabahagi ng Ebanghelyo.
Nilinaw din ni Bishop Baylon na ang pagdiriwang ay naiiba sa Magayon Festival, sapagkat ito ay nakatuon sa panalangin at debosyon kay Maria.
Tema ng pagdiriwang ng Inang Magayon 2026 ang “Maria: Kalakbay sa Misyon, Bitoon nin Ebanghelisasyon,” na layunin isulong ang mahalagang papel na ginagampanan ng Mahal na Ina bilang gabay ng mga mananampalataya tungo kay Kristo.
Ang pagdiriwang ngayong taon ay magkatuwang na inorganisa ng Diyosesis ng Legazpi katuwang ang The Pilgrim Village Foundation, Inc., at Diocesan Shrine and Parish of Our Lady of Salvation.
Inaanyayahan din ang publiko na makiisa sa mga gawain sa Mayo 1, 2026 at sa “Visita Salvacion” na isasagawa sa buong buwan bilang bahagi ng debosyon.
Attached Diocese of Legazpi Diocesan Circular:
