2,954 total reads
Bagama’t nanaig sa Kamara ang suporta ng mga mambabatas sa impeachment complaint laban kay Sara Duterte sa botong 257 — higit sa kinakailangang one-third vote o 106 — nananatili pa rin umano ang agam-agam ng ilang mambabatas kaugnay ng magiging takbo ng paglilitis sa Senado.
Ayon kay Akbayan Partylist Perci Cendaña, umigting ang pangamba matapos ang biglaang pagbabago sa liderato ng Senado kasabay ng isinagawang botohan sa plenaryo ng Kamara hinggil sa impeachment ng Bise Presidente.
“Napakarami natin ngayong agam-agam bilang isang bansa, dahil habang kahapon (May 11) nagtagumpay ang konsensya at ebidensya. Kasi sabi ko nga, yung yesterday vote was about conscience and evidence, kasi nitong nakaraang weekend, grabe-napakatindi ng mga pressures sa members of the House of Representatives, mula sa black propaganda, fake news, hanggang sa outright na pananakot ng partido ni VP Sara Duterte sa mga boboto sa impeachment,” ayon kay Cendaña.
Giit pa ng mambabatas, naging matibay ang Articles of Impeachment dahil dumaan umano ito sa masusing proseso ng pagdinig at pagsusuri ng ebidensya.
“Siguro po, kaya ganun ang nangyari kahapon, kaya unimpeachable-ibig sabihin hindi maaring butasan iyong Articles of Impeachment at naging report ng Committee on Justice ay dahil nga ay ‘we went to the process,” dagdag niya.
Ayon kay Cendaña, bagama’t nanaig ang pagusulong ng impeachment ay hindi naman nakakatiyak ang publiko sa magigiging kahihinatnan ng kaso sa ilalim ng bagong pamunuan ng senado.
Sa panayam ng programang Veritas Pilipinas, sinabi ni Cendaña na ang biglaang pagpasok ni Sen. Ronald Dela Rosa sa Senado matapos ang pagliban ng may anim na buwan ay layunin lamang na tiyakin na palitan ang noo’y si Senate President Vicente Sotto III.
“Nakakabagabag ang nangyari sa Senado, dahil alam naman po natin ‘yung dating senate president, then Senate President Tito Sotto III, sinabi niya sa na sa kaniya malinaw ang ibig sabihin ng ‘forthwith’. Ito yung dictionary definition na alam nating lahat ‘forthwith’ sa lalong madaling panahon ‘immediately,” aniya.
Matatandaang nailuklok bilang bagong Senate President si Sen. Alan Peter Cayetano sa botong 13, na kilalang kaalyado ng Bise Presidente.
Ayon pa kay Cendaña, posibleng nababahala ang kampo ni Duterte sa bigat ng mga ebidensyang maaaring iharap sa impeachment trial.
“Tingin ko kinabahan ang Bise Presidente dahil sa tindi ng ebidensya, at kapag nagsimula ang paglilitis ay mahihirapan silang pasubalian ang mga nakalap na dokumento at testimonya,” pahayag niya.
Binatikos din nito ang pamumulitika sa Senado na nagresulta sa pagpapalit ng liderato sa gitna ng usapin ng impeachment.
Nanawagan naman si Cendaña sa publiko na manatiling mapagbantay upang matiyak na mananaig ang katotohanan sa proseso ng impeachment.
“Napakalaking kasalanan ang pagbali sa katotohanan at ang pagdeny ng due course sa katotohanan dahil hindi lamang ito usapin ni VP Sara Duterte kundi usapin ito ng sambayanang Pilipino,” ani Cendaña.
Dagdag pa niya, maging ang ilang tagasuporta ng Bise Presidente ay nais ding marinig ang paliwanag nito sa paglilitis.
“The Vice President deserves her day in court, so does the Filipino people,” saad ng kongresista.
Una nang inihayag ng House Committee on Justice ang agarang pagpapadala sa Senado ng Articles of Impeachment matapos itong pagtibayin ng plenaryo ng Kamara noong Lunes ng gabi.
Naghahanda na rin ang Mababang Kapulungan sa pagbuo ng 11-member prosecution panel bilang paghahanda sa inaasahang pag-convene ng Senado bilang impeachment court.
