6,399 total views
Nagsama-sama ang pro-environment advocates at Miss Earth beauty queens mula sa sampung bansa upang hikayatin ang publiko na iwasan at bawasan ang basura sa mga pampubliko at pribadong sementeryo ngayong Undas.
Bilang bahagi ng kampanyang Zero Waste Undas 2024 na may temang “Kalinisan sa Huling Hantungan, Igalang ang Kalikasan,” nagsagawa ng pagtitipon ang EcoWaste Coalition sa Manila North Cemetery para ipanawagan ang isang malinis na Undas ngayong taon.
Nakasama ng grupo ang Miss Earth beauty queens mula sa Pilipinas, Argentina, El Salvador, Liberia, Namibia, Nepal, Netherlands, Northern Marianas, Slovenia, at Amerika.
Hinikayat ng EcoWaste Coalition ang publiko na sundin ang “Cemetiquette” o mga patnubay sa responsableng pagdalaw sa sementeryo, tulad ng paggamit ng reusable bags, food containers, at tumblers sa halip na single-use plastics, tamang pagtatapon ng basura, at pag-iwas sa paninigarilyo o pag-vape.
Ayon kay Aileen Lucero, national coordinator ng grupo, ang hindi tamang pagtatapon ng basura ay hindi lamang nakaaapekto sa kasagraduhan ng mga sementeryo kundi nakasasama rin sa kalikasan.
“As we gather in cemeteries to honor our departed loved ones, let us also remember our collective duty to protect the environment. Littering and improper waste disposal not only mar the sanctity of these sacred spaces but also contribute to environmental degradation,” ayon kay Lucero.
Suportado naman ng Miss Earth Foundation ang panawagan ng EcoWaste Coalition laban sa basura sa mga sementeryo sa Metro Manila at sa buong bansa.
Binigyang-diin ni Miss Philippines Earth Ihra Mel Alfeche ang kahalagahan ng kalinisan at responsibilidad ng bawat isa sa pangangalaga ng kalikasan.
“We join the EcoWaste Coalition in calling for zero littering in cemeteries and in advocating for eco-friendly practices during Undas. We can make this time-honored tradition more beautiful by showing respect to the dead and the living, and by taking responsibility for our environment. We invite everyone to embrace Zero Waste Undas for the sake of the common good,” ayon kay Alfeche.
Ayon sa Manila Public Information Office, noong nakaraang Undas ay nakalikom ng 229 metriko tonelada o 86 truck ng basura mula sa Manila North at South Cemeteries mula Oktubre 28 hanggang Nobyembre 1, 2023.
Una nang hinimok ni Capiz Archbishop Victor Bendico ang mga mananampalataya na ituring na sagrado ang pag-alaala at paggalang sa mga banal at yumaong mahal sa buhay ngayong Undas.
