653 total reads
Makiisa ang Radio Veritas 846 sa isasagawang National Consecration to the Immaculate Conception of Mary and St. Joseph sa December 8,2021.
Sa inilabas na sirkular ng Catholic Bishops’ Conference of the Philippines, ibinahagi nitong pangungunahan ni CBCP President Kalookan Bishop Pablo Virgilio David ang pagtatalaga ng bansa sa pamamagitan ng pagdarasal ng Banal na Rosaryo at ang Act of Consecration of Families to St. Joseph.
Gaganapin ito sa San Roque Cathedral sa Diocese of Kalookan dakong alas onse ng umaga kasabay ng pagdiriwang sa Kapistahan ng Paglilihi sa Mahal na Birheng Maria.
Dahil dito, hinimok ng CBCP ang mananampalataya na magkaisa sa pagtatalaga ng bansa sa Mahal na Birheng Maria at kay San Jose upang mabigyang proteksyon sa banta ng iba’t ibang hamong kinakaharap ng lipunan.
“Let us, as one nation, earnestly pray for the continued protection of our Blessed Mother Mary and seek the assistance of our dear father St. Joseph, as we continue to face together the effects of the global pandemic,” bahagi ng pahayag ng CBCP.
Ang pagtatalaga ng mga pamilya kay San Jose ay pagtatapos sa Year of St. Joseph na unang itinalaga ni Pope Francis noong December 2020.
Hinikayat din ng CBCP ang mga arkidiyosesis, diyosesis, mga parokya, religious communities at lahat ng mananampalataya na makiisa sa mahalagang gawain kung saan ang December 8 ay itinalaga ng simbahan bilang Holy Day of Obligation.
Nagpadala rin ang CBCP ng kopya ng mga panalangin sa pagtatalaga na maaring dasalin ng mga simbahan pagkatapos ng panalangin sa pakikinabang ng bawat misa.
Bukod sa Radio Veritas 846, matutunghayan din ang gawain sa DZRV 846 Facebook page, Veritas TV sa Skycable 211, TV Maria, CBCP News, Dominus Est at sa iba’t ibang social media pages ng mga simbahan sa buong bansa.
