652 total views
Natagpuan na si Fr. Leoben Peregrino o mas kilala bilang Fr. Phem na mahigit-48 oras na nawala magmula nang umalis ito ng kumbento noong April 1, 2022.
Sa isang video na natanggap ng Veritas Patrol ay makikita ang sasakyan na lulan ang pari na nakatali ang mga kamay, paa, at leeg na agad namang tinulungan ng mga residente ng Barangay Lumil, Silang, Cavite.
Sa kasalukuyan, iniimbestigahan na ang nangyari kay Fr. Phem na natagpuan halos tatlong araw matapos na ito ay mawala.
Sa pamamagitan naman ng Facebook post ay nagpaabot ng pasasalamat ang kapatid ni Fr. Phem na si Joel Peregrino sa lahat ng mga nanalangin para sa kaligtasan ng pari.
https://m.facebook.com/joel.peregrino.391?fref=nf
“Salamat po sa inyong mga panalangin. Dininig po ng Diyos ang ating mga dasal. Nakita na po si Father Phem Octavo Peregrino sa Barangay Lumil Silang, Cavite. Buhay po siya,” ayon kay Peregrino.
Si Fr. Phem ang kasalukuyang rektor at kura paroko ng Diocesan Shrine and Parish of Our Lady of The Most Holy Rosary – Reina de Caracol sa Rosario, Cavite na saklaw ng Diocese of Imus..
Una nang ibinahagi ni Peregrino sa Radio Veritas na umalis ng kumbento si Fr. Phem noong April 1 bandang alas-9:30 ng umaga na tanging wallet lamang ang dala sakay ng sasakyan ng parokya na isang white Mitsubishi Adventure na may plate number na VES 470.
Kasunod nito ay mayroong nakakita sa pari na nagpapagasolina malapit sa isang mall sa Rosario, Cavite.
“Hindi n’ya po dala ang phone n’ya. Wallet lang po ang dala n’ya. Wala rin po siyang kasama noong umalis ng 9:30 AM sa simbahan,” ayon kay Peregrino sa panayam ng Radio Veritas.
Batay naman sa nakuhang CCTV footage, bandang alas-10:53 ng umaga nang dumaan ito sa Barangay Santiago, General Trias, Cavite kung saan huling namataan ang pari sa pagitan ng alas-11 ng umaga hanggang alas-12 ng tanghali papalabas ng isang mall sa General Trias mayroong suot na violet na T-shirt at maong na pantalon.
Hinihiling naman ng pamilya ni Fr. Phem na patuloy itong isama sa panalangin matapos ang sinapit nito.
Samantala, hinihintay naman ang opisyal na pahayag ng Diocese of Imus kaugnay sa nangyari kay Fr. Phem.