5,815 total reads
Humingi ng paumanhin ang Nuestra Senora del Pilar Shrine and Parish sa Mamburao Occicdental Mindoro sa mga nasaktan sa nangyaring pagtatanghal sa loob ng simbahan kamakailan.
Aminado si Parish Priest Fr. Carlito Meim Dimaano sa mga pagkukulang hinggil sa secular concert sa loob ng simbahan na labis nakasasakit sa damdamin ng mananampalataya dahil sa kawalang paggalang sa bahay dalanginan.
“Buong kababaang -loob po akong humihingi ng kapatawaran sa lahat ng nasaktan mula sa mga pagkakamaling nasaksihan sa Heavenly Harmony Concert na ginanap sa Nuestra Senora del Pilar Shrine and Parish noong ika – 6 ng Oktubre 2024. Inaamin ko pong may mali kaming desisyon ukol dito. Inaako ko po ang lahat ng mga pagkakamaling ito,” bahagi ng pahayag ni Fr. Dimaano.
Gayundin humingi ng paumanhin ang pari kay San Jose Occidental Mindoro Bishop Pablito Tagura dahil sa insidente kung saan ang parokya ay nasasakop ng bikaryato.
Humiling din ng paumnahin si Fr. Dimaano kay Julie Ann San Jose at Jessica Villarubin na nakatanggap ng mga hindi kaaya-ayang komento matapos ang pagtatanghal sa loob ng simbahan.
Matatandaang kinundena ng kristiyanong pamayanan ang pagtatanghal sa loob ng simbahan dahil kalapastanganan ito sa banal na dambana.
“Natuto po ako ng lubos sa pangyayaring ito. Kung maibabalik ko lamang ang panahon, disin sana’y naisakatuparan ng tama at wagas ang gawaing ito na alay kay Maria.
Ipinapangako ko pong hindi na mauulit ang nangyaring ito, ” ani Fr. Dimaano.
Humingi naman ng pang-unawa at kapatawaran ang bikaryato sa insidenteng nangyari sa simbahan.
“We are very sorry for those who have been offended and scandalized. We seek your understanding and beg for forgiveness,” anila.
Isinasaad sa Canon 1239 ‘An altar, whether fixed or movable, must be reserved for divine worship alone, to the absolute exclusion of any profane use’ habang ayon naman sa Canon 1211 Sacred places are violated by gravely injurious actions done in them with scandal to the faithful, actions which, in the judgment of the local ordinary, are so grave and contrary to the holiness of the place that it is not permitted to carry on worship in them until the damage is repaired by a penitential rite according to the norm of the liturgical books.’
