611 total views
Mariing nanawagan ng pagbangon at pag-asa ang Kanyang Kabanalan Leon XIV sa mamamayan ng Angola sa kanyang isinagawang misa sa kanyang pagdalaw sa lugar.
Iniuugnay ng Santo Papa ang karanasan ng mga alagad sa daan patungong Emmaus sa kasaysayan ng bansang sugatan ngunit patuloy na naghahanap ng kapayapaan at pagkakaisa.
Sa kanyang homiliya, kinilala ni Pope Leo ang malalim na sugat ng Angola dulot ng mahabang digmaang sibil at ang mga iniwang hamon nito tulad ng kahirapan, pagkakawatak-watak, at kawalan ng pag-asa.
Inilarawan niya ang kalagayan ng bansa sa pamamagitan ng mga alagad na “may wasak at malungkot na puso,” na tila nakakulong sa sakit at hindi makita ang pag-asa.
Binigyang-diin ng punong pastol ang sentro ng Mabuting Balita na ang muling pagkabuhay ni Kristo ang susi upang makabangon mula sa anumang anyo ng “kamatayan” sa personal man o panlipunang anyo.
“He is alive, he has risen, and he walks beside us… opening our eyes… and granting us the grace to start afresh and rebuild the future,” ayon sa pagninilay ni Pope Leo XIV.
Paalala rin ng Santo Papa na ang presensya ni Kristo ay nararanasan sa panalangin, sa pakikinig sa Salita ng Diyos, at higit sa lahat, sa Eukaristiya.
Gayunman, nagbabala siya laban sa mga gawi na naghahalo ng pananampalataya sa pamahiin, na hindi nakatutulong sa tunay na paglalakbay espirituwal.
Hinikayat ni Pope Leo ang bawat isa sa katapatan sa turo ng Simbahan at sa pagtitiwala sa mga pastol na nangangalaga dito.
Binigyang-diin ng Santo Papa ang konkretong tungkulin ng bawat mananampalataya na maging “tinapay na pinagpira-piraso” para sa kapakanan ng kapwa.
“We too must recognize him… wherever there is a life that becomes like broken bread, wherever someone offers himself… as a gift of compassion,” ani ng Santo Papa.
Sa gitna ng mga hamon ng kahirapan, katiwalian, at kawalan ng pag-asa lalo na sa kabataan, nanawagan si Pope Leo sa isang Simbahang aktibong nakikiisa sa bayan na nakahandang maghilom ng sugat, magpanibago ng pag-asa, at magtaguyod ng kapayapaan at katarungan.
“Do not be afraid… be witnesses of his Resurrection and protagonists of a new humanity and a new society,” aniya.
Paalala pa ng pastol na ang tunay na pagbabago ay nagsisimula sa pananampalataya, nagbubunga sa pagkilos, at humahantong sa isang lipunang pinagtitibay at pinagbubuklod sa pag-ibig, pagkakaisa, at pag-asa.
