1,011 total reads
Ang tunay na diwa ng Pasko ay pag-asa na hatid ng Panginoong Hesus para sa sangkatauhan.
Ito ang paalala ni Diocese of Kidapawan Bishop Jose Colin Bagaforo, chairman ng NASSA/Caritas Philippines kaugnay sa pagdiriwang ng Pasko sa gitna ng krisis na dulot ng COVID-19 at kalamidad na nanalasa sa bansa ngayong taon.
Ayon sa Obispo, sa kabila ng mga suliranin at hamong pinagdaanan ng lahat ngayong taon ay nararapat pa ding magalak at matuwa ang lahat dahil sa pagsilang ng Mesiyas.
Paliwanag ni Bishop Bagaforo, makakaahon at muling makakabangon ang bawat isa sa tulong na rin ng matatag na pananalig at patuloy na pagkapit sa kaloob ng Panginoon.
“Magalak at matuwa tayo sapagkat ang diwa ng pasko ay pag-asa, ang bagong pag-asa na bigay ng ating Panginoong Hesus at ating Mesiyas. Huwag po tayong mawalan ng pag-asa, kaya nating magbagong buhay, magbalik loob po tayo sa Diyos. Kapag tayo ay nagsisikap at laging nakahawak sa kamay ng Diyos tayo ay magtatagumpay sa tulong at awa ng Diyos at sa ngalan ni Hesus makakaahon tayo…”pagninilay ni Bishop Bagaforo.
Partikular na binalikan ng Obispo ang lindol na yumanig sa bansa noong Oktubre at Disyembre ng taong 2019 ay hindi lamang sumira sa maraming bahay at ari-arian kundi yumanig din sa kalooban at kabuhayan ng mamamayan, gayundin ang krisis na idinulot ng COVID-19 pandemic.
Iginiit ng Obispo na dapat tandaan ng lahat na tulad ng isang tunay na Ama ay hindi kailanman pababayaan ng Panginoon ang kanyang mga anak na nagsusumamo at umaapela ng tulong sa gitna ng mga pagsubok at unos sa buhay.
