694 total reads
Kapanalig, tag-ulan na naman. Kasabay ng tag-ulan ay ang sunod-sunod na pagbaha sa maraming lugar sa ating bansa. Handa tayo rito?
Ang flood watch sa ating bansa ay malayo na rin ang nararating. Ngayon, kasama na sa mga regular na forecast ng PAGASA ang basin hydrological forecast. Pinapakita nito ang kalagayan ng mga pangunahing river basins sa ating bansa. Malaking bagay ito dahil nagbibigay ito ng datos hindi lamang ukol sa general weather conditions sa mga river basins ng ating bayan, kundi pati na rin sa water level status at mga posibleng impact ng panahon sa river basins at sa mga pangunahing dam ng ating bayan.
Isa pang magandang development na malaki ang naitutulong sa panahon ng tag-ulan ay ang PhilAWARE, isang instrumento na nagagamit na mga disaster managers sa ating bansa bilang isang national early warning. Sa pamamagitan nito, nakikita ng mga opisyal ng Office of Civil Defense ang tatahaking lugar ng bagyo at ma-track ang mga landslides o pag-guho ng lupa na dulot nito. Dahil nakikita agad ang typhoon track, madaling matutugunan ang mga lugar na nangangailangan ng tulong.
Makikita natin na sa nasyonal na lebel, tunay na naghahanda naman ang ating pamahalaan. Kailangan lamang, kapanalig, macascade ang mga developments na ito sa mga lokalidad. Sa mga nakaraang mga bagyo gaya ni Odette, marami pa rin sa ating mga lokalidad ang hindi sapat ang kahandaan sa mga mas malakas na hagupit ng mga bagyong dumarating sa ating bayan ngayon.
Isa sa kailangan nating ibahagi pa sa ating mga lokal na gobyerno ay ang pag-papalawig pa ng ating approach sa disaster management – huwag lamang sana tayo mapako sa “managing disasters” kundi magtuon din tayo ng pansin sa “managing risk.” Ang pag-ma-manage ng risk, kapanalig, ay mas tutok sa pag-a-anticipate at pagbabawas ng risk. Kapag binigyan natin ng atensyon ito, mula polisiya hanggang implementasyon, mas bawas agad ang mga maapektuhan ng mga sakuna, mas kaunti ang damages at casualty.
Malaking pagbabago ang hinihingi ng pag-ma-manage ng disaster risks, kapanalig. Ibig sabihin nito sa lokal na lebel, hindi lamang tayo mag-e-evacuate ng tao kada may sakuna, at ibabalik sila ulit pag tapos nito. Kapag tayo ay nagma-manage ng risk, hindi lamang tayo kikilos pag parating na ang bagyo, gumagawa na tayo ng mga polisiya at aksyon upang ialis o bawasan na ang risk sa tao at ari-ari-an ng kahit anumang sakuna. Maaaring kasama sa mga aksyon na ito ang relokasyon, panibagong imprastraktura, at iba.
Kapanalig, ang ganitong paghahanda sa mga sakuna ay mahirap gawin pero ito ay ang makatao at makatarungang paraan. Ito ay magsasalba ng buhay. Paalala ng Evangelium Vitae: It is impossible to further the common good without acknowledging and defending the right to life, upon which all the other inalienable rights of individuals are founded and from which they develop.
Sumainyo ang Katotohanan.
