780 total reads
Ikinagalak ng Federations of Free Farmers (FFF) ang pagkaantala ng pagiging miyembro ng Pilipinas sa Regional Comprehensive Economic Partnership (RCEP) na kasunduan ng free trade.
Ito ay matapos hindi magkaroon ng anumang pag-dinig at pag-boto ang mga mambabatas sa Senado sa kanilang pinakahuling Session.
Naunang isinumite sa Senado ang panawagan laban sa RCEP na nilagdaan ng may 127 mga Agricultural groups at indibidwal na naninindigan na hindi makakatulong sa sektor ang patuloy na pagtanggap ng pamahalaan ng imported supplies ng walang taripa.
Sa halip ay pinapahina nito ang lokal na produksyon ng pagkain sa bansa kung saan nakakaranas ng labis na pagkalugi at kawalan ng kabuhayan ang mga mangingisda at magsasaka.
Ayon kay United Broiler Raisers Association (UBRA) President Atty.Bong Inciong, isa sa mga magiging pangunahing suliranin ng pakikibahagi ng Pilipinas sa RCEP ay ang pagpasok at posibilidad ng pagkalat ng ibat-ibang uri ng sakit mga alagaing hayop katulad ng African Swine Fever
Inihayag ni Inciong sa Radio Veritas na hindi nasusunod sa kasalukuyan ang maayos na ‘Quarantine Procedures’ ng mga karne sa ilalim ng mga patakaran sa naunang pakikibahagi sa World Trade Orginazation (WTO).
“Dominado ito ng China, ang ating WTO buong mundo ang kasali, may balanse ka, dito dominado ito ng China, yang China kilalanin na natin diyan nanggagaling yung karamihan ng sakit ng tao atsaka ng hayop, yung ASF diyan din nanggagaling diyan-galing ang china dito nakapasok,” ayon sa panayam ng Radio Veritas kay Inciong.
Pinangangambahan rin ni Inciong ang pagiging ‘Dependent’ ng pamahalaan sa mga imported goods.
Una ng nanawagan ang simbahang katolika ng Pilipinas na bigyang pansin ang pangangailangan ng sektor ng agrikultura ng bansa dahil sila ang pangunahing lumilikha ng pagkain at upang matiyak na mayroong sapat na suplay ng pagkain sa kabila ng Pandemya.
