381 total views
Kapanalig, kung pagbabasehan natin ang social media pati na rin ang mga nangungunang balita sa ating bansa, parang ang gulo gulo ng ating bayan. Ika nga ng millennials, maraming ganap.
Ano nga ba ang kapayapaan? Ayon sa Institute for Economics and Peace, may negative peace at positive peace. Ang negative peace ay ang kawalan ng karahasan o takot sa karahasan. Ang positive peace naman ay ang attitudes o kaugalian, mga institusyon, at struktura na naglilikha at nagpapa-iral ng mapayapang lipunan. Ayon sa 2020 Peace Index ng ahensya, ang ating bansa ay pang 129 sa 163 na bansa. Mababa ang score na ito kapanalig, at ito ay dahil sa internal conflict, pati na rin sa napapansing kriminalidad sa ating bansa.
Siyempre kapanalig, nais natin na magkaroon ng kapayapaan sa ating bayan. Ang kapayapaan kasi, kapanalig, ay prerequisite o kondisyon bago sa kaunlaran o development. Kahit ano kasing ilunsad natin na proyekto, kung laging may manggugulo, hindi ito uusad. May pagsusuri nga ang The Economist noong 2011 pa. Tinatanong nito kung mahirap ba ang mga bansa dahil sila ay marahas, o marahas sila dahil sila ay mahirap? (Are countries poor because they are violent or violent because they are poor?) Ayon sa artikulong ito, ang karahasan ay nagiging poverty trap.
Pero kapanalig, kailangan nating palawakin din ang ating pagka-unawa sa kapayapaan. Karaniwang natin iniisip na gyera lamang, o laban sa NPA, o sa mga sindikato o kriminilad ang batayan ng kawalan ng kapayapaan. Masasabi din natin na ang bangayan sa social media at sa pulitika ay isa ring uri ng karahasan para sa ating lipunan. Ang araw araw na kaguluhan sa politika ng ating bayan na nasasalamin sa mga awayan din ng kanilang followers sa social media ay balakid din sa kaunlaran. Sa halip na nagkakaroon ng isang direksyon ang ating bayan, lalo pa tayong mas pinagwawatak watak nito. At sa ating pagkawatak-watak, ang hirap umusad ng mga magagandang proyekto. Ito, sa aking palagay, ay poverty trap na rin nating maituturing.
Kapanalig, ang teknolohiya ay binibigyan tayo ng pagkakataon na makapagtaguyod ng kapayapaan sa ating panahon ngayon. Pinag-aaralan na ito ng maraming mga eksperto. Ayon nga sa mga researchers, policymakers, at tech companies na dumalo sa 2021 Stockholm Forum on Peace and Development, maari nating malinang ang social media para sa mga proseso ng peacebuilding. Ito ay maaaring magamit para sa conflict stakeholder analysis, social mobilization para sa kapayapaan at demokrasya, pati na rin nga sa mga early warning hindi lamang ng bagyo, kundi sa mga kaguluhan.
Huwag sana nating sayangin ang oportunidad na ito. Ayon nga sa Laborem Exercens: The structure of the present-day situation is deeply marked by many conflicts caused by man, and the technological means produced by human work play a primary role in it. Linangin natin ang teknolohiya, kapanalig, para sa kapakinabangan ng lipunan, hindi para sa kasiraan.