30,694 total views
Pinaaalalahanan ni Taytay Palawan Bishop Broderick Pabillo ang mananampalataya na gunitain ang All Saints Day sa angkop na pamamaraan.
Ayon sa Obispo, hindi kaugalian ng isang kristiyano ang pagsusuot ng mga nakakatakot na mga kasuotan para ipagdiwang ang halloween kundi ilaan ang panahon para parangalan ang mga banal ng simbahan.
“Ang halloween ay hindi selebrasyon ng katatakutan. Dress like saints and emulate them. Isabuhay natin ang kanilang mga halimbawa, yan ang tunay na pagdiriwang sa All Saints Day,” pahayag ni Bishop Pabillo sa Radio Veritas.
Ipinaliwanag ni Bishop Pabillo na ito ang akmang panahon na tularan ang kasuotan ng mga santo para sa maringal na pagdiriwang at paggunita sa kanilang araw hindi para sa mga walang kabuluhang pagtitipon.
Matatandang mariing kinundena ng kristiyanong pamayanan ang pagsusuot noon ni Pura Luka Vega ng kasuotan ng Nuestro Padre Jesus Nazareno sa isang party habang inaawit ang Ama Namin.
Sinabi ni Bishop Pabillo na bilang binyagan nawa’y higit maunawaan ang mga banal na pagdiriwang ng All Saints at All Souls Day kung saan ito ay araw ng mga panalangin para sa mga namayapa.
“Tulad ng pag-alala natin sa mga banal, sa All Souls Day naman alalahanin natin ang ating mga yumaong kaanak, ipagdasal natin ang kanilang kaluluwa. Dapat magtipon ang mga pamilya para gunitain ang mga masayang alaala ng kanilang namayapang mahal sa buhay,” giit ni Bishop Pabillo.
Tinuran ng opisyal na sa pagdalaw sa mga sementeryo ay iwasan ang pagkakaroon ng mga kasiyahan sa halip ay taimtim na manalangin para sa mga nakahimlay.
Naglabas na rin ng kopya ng panalangin ang mga diyosesis na magagamit ng mga pamilya sa pagdalaw sa puntod ng kanilang mga mahal sa buhay.
Una nang sinabi ni Cebu Archbishop Jose Palma na mahigpit sundin ang mga panuntunan sa pagdalaw sa mga sementeryo upang mapanatili ang kaayusan at kapayapaan sa paggunita ng Undas ngayong taon.
