8,671 total reads
Nanawagan si Cebu Archbishop Alberto Uy sa mga Pilipino sa Roma na piliin ang tama kaysa sa madali bilang mahalagang hakbang sa pagtataguyod ng katapatan at paglaban sa katiwalian sa lipunan.
Sa pagdiriwang ng Banal na Misa sa Church of St. Anne sa Vatican, nakiisa ang arsobispo sa White Ribbon Movement sa Pilipinas, na nagsusulong ng katapatan, pananagutan, at katarungan sa pamahalaan.
Binigyang-diin ni Archbishop Uy na ang ugat ng patuloy na paglaganap ng korapsyon ay ang pagpili ng pansariling kapakinabangan kaysa sa tamang konsensya.
“Choose what is right, not what is easy. When we begin to value convenience over conscience, and shortcuts over integrity, corruption takes root and spreads,” ayon kay Archbishop Uy.
Paliwanag ng arsobispo na taliwas sa diwa ng Ebanghelyo ang pagiging makasarili na nagiging daan sa katiwalian, sapagkat ang bawat Kristiyano ay tinatawagan ng Diyos na mamuhay para sa kapakanan ng kapwa.
“We are all called to become God-centered and others-oriented. Corruption, on the other hand, makes us self-centered,” aniya.
Kasabay ng panawagan para sa mabuting pamamahala, hinimok ng arsobispo ang bawat mamamayan na simulan sa sarili ang pagbabago upang tunay na makamtan ng lipunan ang katiwasayan.
Hinikayat din nito ang bawat isa na maging tapat sa maliliit na pasya sa araw-araw bilang kongkretong pagsasabuhay ng pananampalataya.
“Before a nation changes, hearts must change. Before we ask leaders to do what is right, we must first do what is right ourselves. Every day we make simple choices: Will I tell the truth or tell a lie? Will I be honest even when no one is watching? Will I refuse a bribe, even if it means giving up a luxurious lifestyle? Will I choose Christ over convenience?” dagdag ni Archbishop Uy.
Sinabi pa ni Archbishop Uy na ang kabanalan ay nabubuo sa pamamagitan ng paulit-ulit na pagpili sa tama.
Kinilala ng pastol ang sakripisyo ng mga Overseas Filipino Worker na nagtatrabaho sa ibayong dagat para sa kanilang pamilya.
Pinuri niya ang kanilang pagsunod sa batas, pagbabayad ng buwis at patuloy na pagsuporta sa kanilang mga mahal sa buhay sa Pilipinas.
“You work hard, pay your taxes, obey the laws of this country, and faithfully support your loved ones back home. Without your remittances, the Philippine economy would be seriously affected. You are rightly called our modern heroes,” giit ni Archbishop Uy.
Dahil dito, sinabi ni Archbishop Uy na nararapat lamang na magkaroon ang mga Pilipino ng isang pamahalaang may katapatan at integridad upang mapahalagahan ang bawat sentimong pinagsusumikapan ng mamamayan.
Sa kabila ng umiiral na mga suliranin sa bansa, hinikayat ng arsobispo ang mga Pilipino na huwag mawalan ng pag-asa sapagkat marami pa ring mamamayan ang patuloy na pinipiling manatiling tapat.
“Yes, there is corruption in our country. But there are also millions of honest Filipinos—including many of you—who quietly choose what right every single day is,” giit ng arsobispo.
Ayon pa kay Archbishop Uy, bawat tapat na pasya at pagtanggi sa pandaraya ay mahalagang ambag sa pagtatatag ng isang makatarungan at maka-Diyos na lipunan.
Hinimok ng arsobispo ang mga mananampalataya na ang pagsusuot ng puting laso ay hindi lamang simbolo ng panalangin para sa mabubuting pinuno kundi paalala ring mamuhay bilang tapat na alagad ni Kristo.
“So as you wear your white ribbon today, let it remind you not only to pray for honest leaders but also to become honest disciples of Christ,” saad ng arsobispo.
Kasalukuyang nasa Roma si Archbishop Uy para sa pagkakaloob ni Pope Leo XIV ng pallium sa mga bagong arsobispo ng simbahan, kung saan sa Pilipinas, bukod kay Archbishop Uy, ay tatanggap din sina Nueva Segovia Archbishop David William Antonio at Cotabato Archbishop Charlie Inzon.
