Muling itinalaga ang Pilipinas sa mapagkalingang pangangalaga sa Mahal na Birhen, Reyna ng Kapayapaan.
Pinangunahan ni Manila Archbishop Jose Cardinal Advincula ang consecration sa ikawalong araw ng misa nobenaryo ng National Shrine of Mary Queen of Peace of EDSA Shrine nitong February 23.
Ayon sa cardinal ang pagtalaga ay tanda ng paninindigang patuloy itaguyod ang kapayapaan lalo na sa kasalukuyang panahon na maraming hamong kinakaharap ang bansa tulad ng hindi pagkakasundo ng mga lider at labis na paglaganap ng fake news.
“The Entrustment to Our Lady of Peace is an expression of our commitment to peace, justice, and good governance,” bahagi ng mensahe ni Cardinal Advincula.
Napapanahon ang panawagan ng arsobispo lalo’t gugunitain ng bansa ang ika – 39 na anibersaryo ng EDSA People Power Revolution na tinaguriang bloodless revolution sa buong mundo at matibay na pagpapahayag ng masidhing pananampalataya ng mga Pilipino na sa pamamagitan ng mga panalangin ay nakamit ang kapayapaan at kalayaan ng bansa.
Umaasa si Cardinal Advincula na tulad ng Mahal na Birheng buong pusong umawit ng Magnificat para sa katarungan at kapayapaan ng Israel noon ay magkaisa ang mga Pilipino sa pagsusulong ng makatarungan at malayang bansa.
“We cannot be truly pueblo amante de Maria if we are pious and devout in our personal lives but disregard God’s precepts,” ani Cardinal Advincula.
Batid din ng opisyal ang laganap na fake news sa bansa na kadalasang pinaniniwalaan ng mga ordinaryong mamamayan lalo na ang mga nababasa at napapanuod online.
Dalangin ni Cardinal Advincula na gawing huwaran ang Mahal na Ina sa pagtataguyod ng katotohanang nakabatay sa mga turo ng Panginoon.
“We cannot be truly pueblo amante de Maria if we destroy our land with disinformation, abuse, violence, corruption, and destruction of creation. /lMaging mapagmahal tayo katulad ni Maria,” giit ni Cardinal Advincula.
Samantala itinatag naman ang EDSA Shrine noong 1989 o tatlong taon makalipas ang matagumpay na pag-alsa ng mga Pilipino laban sa dalawang dekadang diktadurang pamamahala ni dating Pangulong Ferdinand Marcos Sr.
“This shrine is a testament to God’s protection and Our Lady’s maternal embrace,” saad ng arsobispo.
Kasalukuyang pinamumunuan ni Fr. Jerome Secillano ang EDSA Shrine na unang nanindigang patuloy na isabuhay ang diwa at aral ng EDSA People Power na hindi lamang usaping pulitikal kundi paghahayag sa matatag na pananampalataya ng sambayanan.
