8,200 total reads
Nagpahayag ng buong suporta si 2025 Ramon Magsaysay Awardee at Divine Word Missionary Priest Rev. Fr. Flavie Villanueva, SVD kay House private prosecutor Atty. Amando Ligutan, kasabay ng pagkilala sa kanilang naging magkatulad na karanasan sa pagharap sa pananakot at panggigipit habang isinusulong ang pagtatanggol sa karapatang pantao.
Ayon kay Fr. Villanueva, hinahangaan niya ang paninindigan ni Atty. Ligutan sa pagtatanggol sa mga tagapagtanggol ng karapatang pantao laban sa walang batayang red-tagging at labis na paggamit ng kapangyarihan ng ehekutibo.
“For truth, justice, and genuine service to the poor, I fully stand with Atty. Ligutan.” Pahayag ni Fr. Villanueva.
Si Fr. Villanueva ay kilala sa kanyang adbokasiya para sa mga Persons Deprived of Liberty (PDLs), mga biktima ng extrajudicial killings, at iba pang nasa laylayan ng lipunan sa pamamagitan ng Arnold Janssen Kalinga Foundation at ng Program Paghilom.
Bilang tumanggap ng 2025 Ramon Magsaysay Award, patuloy na isinusulong ni Fr. Villanueva ang pagtatanggol sa dignidad ng tao, katarungan, at paggalang sa karapatang pantao bilang bahagi ng misyon ng Simbahan na maging tinig ng mga naaapi at nangangailangan.
