122,304 total views
Naninindigan ang Radio Veritas na ipagpatuloy ang pagiging tinig ng katotohanan at pag-asa sa gitna ng lumalalang krisis sa lipunan sa pagdiriwang ng ika-57 anibersaryo ng himpilan.
Sa mensahe ni Fr. Roy Bellen, Pangulo ng himpilan, iginiit na nananatiling mahalaga ang papel ng media ng Simbahan lalo na sa panahon ng kaguluhan at paghihirap.
“Amid ongoing social issues, war-related suffering, and economic struggles, Radio Veritas is committed to its prophetic role,” pahayag ni Fr. Bellen.
Binigyang-diin ng pari ang misyon ng himpilan na magsilbing boses ng mga naaapi at tagapagtaguyod ng katotohanan sa lipunan.
“We aim to give a voice to the voiceless, uphold truth with charity, and support the faithful with uplifting messages,” ayon pa sa pari.
Iniugnay ni Fr. Bellen ang misyon ng media arm ng Archdiocese of Manila sa diwa ng Mahal na Araw, partikular sa pagpapakasakit at muling pagkabuhay ni Hesus na patuloy na nagbibigay ng pag-asa sa mamamayan sa gitna ng mga hamong kinakaharap.
Ayon sa pari, ang muling pagkabuhay ni Kristo ang patunay na mananaig ang pag-asa sa kabila ng anumang pagsubok.
“The suffering and death of our Lord Jesus Christ remind us that darkness and despair do not have the final word. Christ’s resurrection from the tomb signifies new life, triumphing over darkness, conflict, and despair,” dagdag pa ni Fr. Bellen.
Sa loob ng 57 taon, patuloy na nagsisilbing tanglaw ng pananampalataya at katotohanan ang Radio Veritas, na may paninindigang ipagpatuloy ang paglilingkod sa sambayanan.
“Today, we reaffirm our mission… to be the light in confusion, a voice of peace in division, and a witness of hope in trials,” saad ng pari.
Sa kabila ng iba’t ibang hamon sa lipunan, nananatiling buo ang tiwala ng himpilan na patuloy itong gagabayan ng Diyos tungo sa pagbabagong may pag-asa at tagumpay.
Itinatag ang Radio Veritas kasunod ng pagpupulong ng mga obispo mula sa Asya at Oceania noong December 10, 1958 sa University of Santo Tomas, na may layuning magtatag ng isang himpilang Katoliko para sa ebanghelisasyon at paghahatid ng balita.
Pormal itong binuksan noong April 11, 1969 sa Fairview, Quezon City, sa pangunguna nina Cardinal Antonio Samorè na kinatawan noon ng Vatican at Manila Archbishop Rufino Cardinal Santos. Noong 1970, binisita at binasbasan ni noo’y santo papa St. Paul VI ang estasyon.
