431 total views
Labis na kahanga-hanga ang ipinamalas na pananampalataya ng mga Filipino sa Nationwide tour ng Incorrupt Heart ni St. Pader Pio mula Luzon, Visayas, at hanggang Mindanao.
Ito ang inihayag ni Father Joselin Gonda – Rector ng National Shrine of Saint Padre Pio sa Santo Tomas Batangas, matapos niyang masaksihan ang pagbisita ng puso ng Santo sa tatlong Rehiyon ng Bansa.
Sinabi ng Pari na inaasahan na ng mga namamahala ang dami ng mga deboto ni St. Padre Pio, subalit nasorpresa sila dami ng dumating na mga mananampalataya.
Naniniwala din si Father Gonda na ang Santo ay maituturing na Saint of the Millenium, dahilan kung bakit labis ang pagnanais ng mga Filipino na masilayan at makapagdasal sa kanyang puso.
“Extraordinary yung response ng mga tao, sobrang dami nung nagpunta at nag-venerate we are very surprised sa dami ng nagpunta at dumating. Padre Pio is the St. of the millenium kasi siya yung Santo na inabot na ng ating panahon. He is well known for miracles and healing received by people na nagdedebosyon sa kanya kaya very popular si Padre Pio.” Pahayag ni Father Gonda sa Radyo Veritas.
Ibinahagi din ng pari ang kanyang kagalakan dahil sa patuloy na pagdagsa ng mga deboto sa pambansang dambana ni St. Padre Pio simula nang makabalik dito ang incorrupt heart noong ika-18 ng buwan.
Inihayag ni Father Gonda na nasaksihan nito ang pag-asang naidulot ng Santo sa mga Filipino na nagpupunta sa dambana.
Marami sa mga mananampalataya ang humaharap sa mga suliranin, humihingi ng kagalingan sa iba’t-ibang aspeto ng kanilang buhay, at umaasa na sa tulong ng panalangin ni St. Padre Pio ay makatatanggap sila ng himala mula sa Panginoon.
Sinabi ni Father Gonda na ito ang tanda ng hindi nagmamaliw na pag-ibig at pananampalataya ng mga Filipino sa Panginoon, at sa tulong ng Santo ay lalo pa itong napag-aalab at napapalapit ang bawat isa sa Diyos.
“Padre Pio has offered a lot of hope to the Filipinos. Pinakita ng kanyang pagbisita na hindi tumitigil ang pananampalataya ng mga tao. Hindi nawawalan ng pag-asa ang mga tao, ang tingin ko, a Filipino people who is suffering they are always people waiting for miracles to happen, they always ask for miracles, for blessing coming from God, and Padre Pio provides that symbol.” Dagdag pa ni Father Gonda.
Ngayong Biyernes ika-26 ng Oktubre nakatakda nang umalis ang incorrupt heart ni St. Padre Pio sa Pilipinas.
Pinaalalahanan ni Father Gonda ang mga mananampalataya na wala nang veneration sa araw na ito dahil matapos ang farewell mass ng alas nuebe ng umaga ay agad nang aalis ang mga Italian friars dala ang incorrupt heart ni St. Padre Pio.
