28,792 total reads
Itinakdang ipagdiwang ang Dakilang Kapistahan ng Kristong Hari noong 1925 sa kapasyahan ng noo’y Papa Pio XI. Tugon ito ng simbahan sa lumalaganap na pananaw na hindi kailangan ng pananampalataya sa Diyos para sa pag-unlad ng lipunan. Pero hanggang ngayon, pinaninindigan natin na magbago man ang pulitika, ekonomiya at pamunuan, kung hindi naman nagbabago ang puso ng mamamayan, posible ba talaga ang tunay na kaunlaran? Kaya nga sa dakilang kapistahang ito, iluklok natin si Hesus sa ating mga puso at hayaang siya ang masunod sa ating buhay. Anupa’t ang tunay na kaunlaran, hindi nasusukat sa lawak ng kapangyarihan o dami ng kayamanan kundi sa mga mamamayang nagmamahalan at nagmamalasakitan.
