65 total views
Nanawagan si ACT Teachers Party-list Representative at Deputy Minority Leader Antonio Tinio sa Department of Education (DepEd) na hindi lamang pagtuunan ng pansin ang pagsasagawa ng active shooter drills kundi ang pagtugon sa ugat ng karahasan sa mga paaralan.
Ayon kay Tinio, mahalagang maturuan ang mga guro at mag-aaral ng tamang pagtugon sa mga emergency, ngunit hindi sapat ang mga drill kung hindi naaayos ang mga problemang nagiging sanhi ng karahasan.
“Preparedness is necessary, but it is no substitute for prevention. School safety cannot rely on emergency protocols alone. It requires confronting the systemic conditions that enable violence,” ayon kay Tinio.
Dagdag pa ng mambabatas, “Dapat tukuyin at ayusin ng gobyerno ang mga ugat ng karahasan. Kailangan ng mas malaking budget para sa edukasyon, mas maraming guro, mas malakas na mental health support, at tunay na accountability. Ito ang tunay na solusyon, hindi lamang drills.”
Binigyang-diin ng mambabatas na kailangang tugunan ng DepEd ang kakulangan sa pondo, kakapusan ng mga guro, limitadong mental health services, mahinang seguridad sa mga paaralan, at kawalan ng pananagutan sa mga insidente ng karahasan.
Iginiit ni Tinio na dapat manatiling ligtas at mapayapang lugar ang mga paaralan at hindi mga institusyong nakasandig lamang sa mga emergency drill.
Nanawagan din ang kongresista sa pamahalaan na palakasin ang pamumuhunan sa edukasyon, dagdagan ang bilang ng mga guro, palawakin ang mental health support, at tiyaking may pananagutan ang mga responsable sa karahasan upang tunay na maprotektahan ang mga mag-aaral at mga guro.
